Uburozi mu ikariso: Intasi y’u Burusiya yahishuye amayeri yakoresheje mu kugerageza kwica utavugwa rumwe na Putin

Yanditswe na Ndahayo Emmanuel
Kuya 22 Ukuboza 2020 saa 10:19
Yasuwe :
0 0

Mu buryo bumeze nk’ibitangaza, intasi y’u Burusiya yahishuye byinshi ku gitero cyari gihitanye Alexey Navalny, umwe mu bakomeye batavuga rumwe n’u Burusiya.

Iyi ntasi yitwa Konstantin Kudryavtsev, ni umukozi mu gashami gashinzwe intwaro z’ubumara mu Ishami rishinzwe Ubutasi mu Gisirikare cy’u Burusiya (SFB).

Uyu mugabo yahamagawe na Navalny ku giti cye, amubwira ko ari umwe mu bayobozi bakuru b’inzego z’iperereza, kandi ko amuhamagaye kugira ngo amenye amakuru y’icyatumye uburozi yahawe butamuhitana.

Kudryavtsev yabanje kwinangira, kuko yari ahamagawe kuri nimero ye bwite, ku buryo atari yizeye umutekano wayo dore ko yarimo kubazwa amakuru akomeye.

Nyuma yo guhatirizwa inshuro nyinshi, uyu mugabo yaje gutobora aravuga, mu kiganiro cyamaze iminota irenga 45.

Nimero za telefoni ngendanwa za Kudryavtsev zabonetse nyuma y’ubushakashatsi bwakozwe na CNN ifatanyije na Bellingcat, baza kubona amakuru y’abantu bikekwa ko bari mu gikorwa cyo kuroga Alexey Navalny, wakunze guhangana cyane na Leta ya Putin, ayishinja ibikorwa birimo ruswa ndetse no kwigwizaho umutungo, akavuga ko ibyo ari yo ntandaro y’ubukene bwibasiye Abarusiya muri iyi minsi.

Amakuru avuga ko Putin yatangiwe guterwa ubwoba n’uyu mugabo ahagana mu 2016, bimaze kugaragara hari igice kinini cy’abaturage bamushyigikiye cyane cyane abatuye mu Mijyi, bakiri bato kandi bifuza ko igihugu cyabo cyagirana umubano mwiza n’u Burayi ndetse na Amerika.

Mu 2017 nibwo ku mabwiriza ya bamwe mu bayobozi bakomeye b’u Burusiya, inzego z’ubutasi zatangiye gukurikirana Navalny mu buryo buhoraho, bakamugendaho aho ari hose ndetse no hanze y’igihugu.

Icyo gihe ngo nibwo itsinda rifite ubumenyi buhambaye mu byo gukoresha uburozi, rikorera mu Ishami ry’Ubutasi ry’u Burusiya, na ryo ryahawe inshingano zo gushaka uko zaroga Navalny, na ryo ritangira kujya rimukurikira.

Mu kiganiro na Navalny, Kudryavtsev yasobanuye ko atari we wagombaga gutanga uburozi, ndetse ko atari ahari ubwo igikorwa cyo kumuroga cyakorwaga, ahubwo we yari ashinzwe kujya guhanagura ibimenyetso bw’ubumara bishobora kuba byasigaye ahabereye igikorwa, ku buryo inzego z’iperereza zitandukanye zidashobora kuzabona ibimenyetso bishobora kuganisha ku gukeka uruhare rwa leta y’u Burisiya muri iki gikorwa.

Uyu mugabo ngo yagiye mu mujyi wa Tomsk, ari na wo wabereyemo igikorwa cyo kuroga Navalny, nyuma y’iminsi itanu, n’ubwo bishoboka ko ashobora kuba yari ahari na mbere yaho.

Kudryavtsev yavuze ko Navalny mu myaka itatu yari amaze akurikiranwa n’inzego z’ubutasi, asobanura ko “yitwararikaga cyane, agahinduranya ibyumba bya hoteli araramo inshuro nyinshi, kandi agakunda kwitondera buri kimwe cyose yashobora gukora”.

Izi ntasi ariko nazo ntizari zoroshye, kuko “zirindaga ko hari uzimenya, ntizimukurikire mu ndege imwe, zigahinduranya imyenda inshuro nyinshi kandi ntizifate amafoto ayo ari yo yose”.

Kera kabaye rero, umwe muri izi ntasi, mu buryo Kudryavtsev atasobanuye neza, yaje kwinjira mu cyumba Navalny yararagamo muri hoteli, maze ashyira uburozi buzwi nka Novichok mu kenda k’imbere ka Navalny.

Novichok ni uburozi bukoreshwa cyane n’inzego z’ubutasi z’u Burusiya mu kwikiza abo batavuga rumwe. Ubu burozi bushobora kuba budasukika cyangwa busukika. Ubwakoreshejwe ku kenda k’imbere ka Navalny ni ubudasukika.

Iyo ubu burozi bushyizwe mu kenda k’uwo bugenewe, hanyuma akaza kubira ibyuya, bwinjira mu mubiri kandi bufite ubushobozi bwo guhitana ubuhawe mu gihe gito, iyo hatabayeho ubutabazi bwihuse.

Amaheruzo Navalny yaje kwambara ka kenda bwashyizwemo, maze afata urugendo ava mu Mujyi wa Tomsk ajya Moscow, ariko aza kugwa by’amarabira mu ndege ata ubwenge, biba ngombwa ko abapilote bakatisha indege kugira ngo ajyanwe mu bitaro kwitabwaho.

Iki gikorwa ngo ni cyo cyakijije uyu mugabo, kuko iyo batindaho gato, ubumara bw’uburozi bugakwira mu mubiri hose, yakabaye yarahasize ubuzima. Amahirwe yabaye ko indege itari yakageze kure mu rugendo, ku buryo kumusubiza aho yabona ubutazi bw’ibanze byari bigishoboka.

Navalny yaje no kujyanwa kuvurirwa mu Budage, ari na ho akiri magingo mu gace k’ibanga. Usibye uyu mugabo, inzego z’ubutasi z’u Burusiya zishinjwa ko zakoresheje uburozi bwa Novachok ku bagabo babiri b’Abarusiya barogewe mu Bwongereza, icyo gihe hakoreshejwe uburozi busukika.

Hagati aho, inzego z’ubutasi z’u Burusiya zamaganye aya makuru, zivuga ko ibyatangajwe atari byo ahubwo ari uburyo inzego z’ubutasi z’ibindi bihugu zikoresha mu kwanduza izina ry’inzego z’ubutasi z’u Burusiya.

Mu kiganiro n’abanyamakuru giherutse kuba mu minsi ishize, Perezida Putin yabajijwe kuri iki kibazo, avuga ko ari “ibihimbano bigamije gutuma abaturage b’u Burusiya batera Leta yabo icyizere”, yongeraho ko “iyo inzego zacu z’ubutasi ziba zarashatse kumwica, ntabwo yari kurokoka”.

Usibye Konstantin Kudryavtsev, abandi bageragejwe kugira ngo batange amakuru barabyanze, nyuma yo kuvumbura ko bashobora kuba bari kuvugana na Alexey Navalny.

Uyu ni Konstantin Kudryavtsev, umuhanga mu by'ubutabire wari ushinzwe gusibanganya ibimenyetso nyuma y'igikorwa cyo kuroga Navalny. Ni nawe wamuhaye amakuru atabizi
Alexey Navalny utavuga rumwe na Putin, ari mu kiganiro kimuhishurira uko umugambi wo kumwica wacuzwe
Uyu ni Oleg Tayakin, nawe bivugwa ko yari mu gikorwa cyo guhitana Navalny, ariko yanze gutanga amakuru ndetse anafunga urugi nyuma yo kubwirwa ko umuntu umuhagaze imbere uje kumusura ari umunyamakuru
Navalney agejejwe ku kibuga cy'indege kugira ngo ahabwe ubutabazi bw'ibanze nyuma yo guta ubwenge ari mu ndege
Uyu mugabo akunzwe n'urubyiruko kandi rutuye mu mijyi, akaba ashinja Putin gukenesha Abarusiya kubera ruswa no kwikubira umutungo w'igihugu
Mu kiganiro aherutse kugirana n'abanyamakuru, Putin yavuze ko inzego z'ubutasi ze zari bwice Navalny iyo zibishaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .