U Bwongereza bwemeje urukingo rwa AstraZenica rutegerejwe cyane n’ibihugu bikiri mu nzira y’amajyambere

Yanditswe na Ndahayo Emmanuel
Kuya 30 Ukuboza 2020 saa 08:51
Yasuwe :
0 0

Leta y’u Bwongereza yemeje ubuziranenge bw’urukingo rwakozwe na AstraZenica ku bufatanye na Kaminuza ya Oxford y’aho mu Bwongereza ruba urwa kabiri rwa Coronavirus rwemerewe gukoreshwa muri icyo gihugu nyuma y’urundi rwa Pfizer-BioNTech rumaze guhabwa abarenga ibihumbi 600.

Minisitiri w’Intebe w’u Bwongereza, Boris Johnson, yavuze ko iyi ari intsinzi ku bahanga b’icyo gihugu bamaze amezi arenga icyenda bakora uru rukingo, avuga ko “igihugu cye kigiye gukingira abantu benshi bashoboka mu gihe gito gishoboka”.

U Bwongereza butangaza ko bwamaze kugura inkingo miliyoni 100 zakozwe na AstraZenica, zizakingira abantu miliyoni 50, dore ko uru rukingo, kimwe n’izindi nyinshi ziri gukorwa n’izarangiye, ruzaterwa inshuro ebyiri, rumwe rugatangwa nyuma y’amezi atatu hatanzwe urundi.

Abakoze uru rukingo bavuga ko uko hashira igihe kirekire hagati y’inkingo zombi, ari ko umubiri ugira ubushobozi bwo kubaka ubudahangarwa bwo hejuru bwo kurwanya Coronavirus.

Ku rundi ruhande ariko hari abavuga ko kuba hacamo igihe kinini hagati y’inkingo zombi ari ikibazo kuko bishobora kuzatuma abafashe urwa mbere bibagirwa igihe bazaherwa urwa kabiri cyangwa se bakabyihorera kubera izindi mpamvu.

Muri miliyoni 66 z’Abongereza, iki gihugu gitangaza ko cyamaze kugura inkingo “zakingira buri muturage wese ubishaka” habariwemo n’izindi nkingo iki gihugu cy’igihangange cyaguze zakozwe na Pfizer-BioNTech na Moderna.

Urukingo rwa AstraZenica ntirusaba amabwiriza yihariye mu kurubika, kuko rushobora kubikwa muri frigo zisanzwe. Ni urukingo rwari rutegerejwe, cyane cyane n’ibihugu biri mu nzira y’amajyambere kuko rubikika mu buryo bworoshye kandi rukazaba ruhendutse cyane ugereranyije n’izindi.

Bivugwa ko uru rukingo ruzaba rugura 4 000 Frw, igiciro gito cyane ugereranyije n’urwa Pfizer-BioNTech ruzagura 20 000 Frw ndetse n’urwa Moderna ruzagura 33 000 Frw.

Byitezwe mu cyumweru gitaha u Bwongereza buzatangira gutanga uru rukingo mu baturage, dore ko iki gihugu cyugarijwe cyane n’ikwirakwira ry’icyorezo cya Coronavirus rikabije, nyuma y’aho kibonetsemo ubwoko bushya bwa Coronavirus bwandura vuba ku kigero cya 70% ugereranyije n’ubusanzwe.

Nko ku wa Kabiri abarenga ibihumbi 53 mu Bwongereza basanzwemo Coronavirus, ari na wo mubare munini ugaragaye kuva iki gihugu cyatangira gupima abarwaye iki cyorezo.

Mu minsi ishize, uru rukingo rwibajijweho cyane bitewe n’uko umwe mu baruhawe yagaragaje ibibazo by’ubuzima, bituma ibikorwa by’igeragezwa ryarwo bihagarikwa.

Ku bw’amahirwe ariko uru rukingo rwaje kongera gukomorerwa ndetse inzego z’ubuzima zivuga ko rushobora gukingira abantu ku kigero kiri hagati ya 62% na 90%, ikigaragazwa nk’igihagije mu kurinda umuntu kwandura agakoko ka Coronavirus.

Minisitiri w’Intebe w’u Bwongereza, Boris Johnson, avuga ko abashakashatsi bavumbuye urukingo rwa AstraZenica bahesheje ishema igihugu cye ku ruhando mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .