Mu bice bimwe bya Chiba, haguye imvura irenga milimetero 360 mu masaha 24, bituma imihanda n’inzira za gari ya moshi zirengerwa n’amazi.

Abayobozi batangaje ko abantu bane bapfuye, barimo umwe wari waheze mu modoka yarengewe n’amazi. Undi muntu aracyashakishwa, mu gihe abasirikare boherejwe muri ako gace gufasha mu bikorwa by’ubutabazi.

Guverineri wa Chiba, Toshihito Kumagai, yavuze ko ibyabaye bidasanzwe.
Yagize ati “Nagiye mpura n’ibiza byinshi mu bihe byashize, ariko sinigeze mbona ibintu nk’ibi.”

Sosiyete Tokyo Electric Power yatangaje ko ingo zirenga 22.000 zabuze amashanyarazi ku wa 14 Kanama, saa Tanu z’amanywa. Mu Mujyi wa Chiba wibasiwe cyane, abantu babarirwa mu magana baraye mu nyubako za leta nk’ahantu hagenwe ho kwikinga.

Ku Kibuga cy’Indege cya Narita, abagenzi bagera ku 7.000 babuze uko bagenda kubera ikirere kitameze neza. Ubuyobozi bw’ikibuga bwatangaje ko ingendo zose ziteganyijwe gukora neza ku wa Gatanu. Japan Airlines yo yavuze ko zimwe mu ngendo zayo zishobora gutinda, ariko ko nta zari zitezwe guhagarikwa.

Imihanda minini imwe n’imwe muri Chiba yafunzwe, bituma imodoka zikoresha indi mihanda, biteza umuvundo ukomeye. Serivisi zimwe za gari ya moshi nazo zahagaritswe, nubwo zimwe mu zihuza Narita na Tokyo zongeye gukora.

Mu ijoro, abagenzi babarirwa mu magana bahawe ibiringiti, amazi n’ibiribwa n’abakozi b’ikibuga mbere yo kurara mu nyubako bategererezamo indege.

Umugenzi w’Umunyamerika wari waheranye n’umuryango we yagize ati: “Ntabwo tuzigera twibagirwa uru rugendo.”

Abagenzi bamwe baheze ku bibuga by'indege kubera imvura