U Buyapani bushobora kwimura imikino ya Olempiki kubera gutinya Coronavirus

00:00:00 IGIHE NETWORK

KINYARWANDA

ENGLISH

FRANCAIS

U Buyapani bushobora kwimura imikino ya Olempiki kubera gutinya Coronavirus

Yanditswe na Evariste Nsengimana

Kuya 3 March 2020 saa 07:30

Yasuwe :

Yavuzweho:

Perezida w’Ishyirahamwe ry’Imikino ya Skate mu Buyapani, Seiko Hashimoto, yatangaje ko imikino ya Olempiki yagombaga kubera i Tokyo hagati yo ku wa 24 Nyakanga na 9 Kanama 2020 ishobora gusubikwa, ikimurirwa mu mpera z’umwaka kubera icyorezo cya Coronavirus cyibasiye Isi.

Coronavirus yadutse mu Bushinwa mu mpera za 2019, ubu imaze kugera mu bihugu birenga 60 mu gihe imaze guhitana abasaga 3000.

Hashimoto ushinzwe gutegura imikino Olempiki mu Buyapani yabwiye Inteko Ishinga Amategeko ko amasezerano igihugu cye gifitanye na Komite Olempiki Mpuzamahanga avuga ko ‘igomba gukinwa mu 2020’.

Ati “Bishobora gusobanura kwemera isubikwa.Turi gukora ibishobora kugira ngo iyi mikino izakinwe nk’uko yateguwe.”

Komite Olempiki Mpuzamahanga niyo ifite uburenganzira bwo gusesa amasezerano yagiranye n’u Buyapani yo gutegura no kwakira imikino ya 2020 ariko Perezida wayo, Thomas Bach, yavuze ko hari icyizere ko izagenda neza.

Ati “Ndashaka gusaba abakinnyi bose gukomeza kwitegura bafite icyizere.”

Kugeza ubu hari amarushanwa akomeye amwe yamaze gusububikwa kubera Coronavirus arimo Shampiyona y’Isi ikinirwa mu nzu [World Athletics Indoor 2020] n’isiganwa ry’amamodoka rya Chinese Grand Prix yagombaga kubera mu Bushinwa.

Perezida w’Ishyirahamwe rya Skate mu Buyapani akaba n'ushinzwe gutegura imikino Olempiki, Seiko Hashimoto, yatangaje ko ishobora gusubikwa igakinwa mu mpera z'umwaka