U Burayi bwakangaranyijwe n’ubwoko bushya bwa Coronavirus

Yanditswe na Muhonzire Sylvine
Kuya 22 Ukuboza 2020 saa 09:27
Yasuwe :
0 0

Mu bihugu by’i Burayi cyane cyane mu Bwongereza hakomeje kugaragara ubwoko bushya bwa Coronavirus aho bivugwa ko bwo bwandura cyane ku kigero cya 70% kuruta Covid-19.

Ubu bwoko bushya bwa Coronavirus buracyari gukorwaho iperereza, bwahawe izina rya VUI-202012/01, muri uku kwezi nibwo bwa mbere bwagaragaye mu Bwongereza. Abashakashatsi ntibaramenya imiterere yabwo ariko hari ubwoba ko bukwirakwira kurusha SARS-CoV-2 itera COVID-19.

Bivugwa ko ubu bwoko bukwirakwira mu Bwongereza ku kigero cya 70% kurusha virus isanzwe. Bwibasiye cyane igice cy’Amajyepfo y’u Bwongereza aho umubare w’abantu banduye bari mu bitaro ukomeje kuzamuka cyane mu bice bya Londres na Kent.

Kugeza ubu ibihugu birenga 40 byamaze guhagarika ingendo zijya ndetse n’iziva mu Bwongereza kugira ngo bigabanye ikwirakwira ry’iyi virus nshya. Gusa Umuryango w’Ubumwe bw’u Burayi (EU) uri gutegura ibiganiro bigamije gufata ingamba nshya kuri iyi virus.

Iyi virus nshya bivugwa ko yaba yaratewe n’abantu bafite ubudahangarwa buke bw’umubiri, bityo imibiri yabo ikananirwa kurwanya Covid-19 byatumye yirema mu bundi buryo ikaza ari indi virus nshya.

Gusa Umuyobozi ushinzwe ibikorwa by’ubutabazi mu Ishami ry’Umuryango w’Abibumbye Rishinzwe Ubuzima ku Isi (WHO), Mike Ryan, yavuze ko ibi ari ibisanzwe ko virus igenda iza mu bundi buryo, kandi ko nta gikuba cyacitse.

Uretse u Bwongereza, yagaragaye kandi mu bihugu nka Australie, u Butaliyani na Danemark ndetse byatumye Suède bituranye ihagarika ingendo zijya ndetse n’iziva muri icyo gihugu.

Ubu bwoko bushya bwa Virus kandi bwagaragaye no muri Afurika y’Epfo gusa ho bivugwa ko bushobora kuba butandukanye n’ubwagaragaye mu Bwongereza.

Mu bihugu byahagaritse ingendo zigana mu Bwongereza harimo u Buhinde, Iran na Canada, gusa Leta Zunze Ubumwe za Amerika zo ntizirafata icyemezo cyo guhagarika indege ziva muri iki gihugu.

Ikindi kandi ni uko indege ebyiri (Delta na British Airways) ziva mu Bwongereza zemerewe kujyana abagenzi badafite ubwandu bwa Covid-19 ku kibuga cy’indege cya John F Kennedy i New York.

Impuguke zitandukanye zavuze ko iyi virus nshya ishobora kuba yarageze n’ahandi henshi hataramenyekana, gusa zishimira u Bwongereza bwashyizeho itsinda ry’abashakashatsi ryo kugenzura iyi virus nshya.

Ntabwo abashakashatsi baremeza niba inkingo nk’urwakozwe na Pfizer/BioNtech cyangwa izindi zishobora kurinda ikwirakwira ry’ubu bwoko bushya bwa COVID-19.

Ibice byinshi by’u Bwongereza byibasiwe n’ubu bwoko bushya bwa Covid-19 / Ifoto: Reuters

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .