U Buhinde: Umwana w’umukobwa yashyinguwe mu kabindi ari muzima

Yanditswe na Bukuru JC
Kuya 14 Ukwakira 2019 saa 01:04
Yasuwe :
0 0

Mu gisa n’igitangaza, umugabo wo mu Majyaruguru y’u Buhinde, yasanze umwana w’umukobwa washyinguwe ari muzima mu kabindi, ubwo nawe yarimo gucukura ngo ashyingure umwana we w’umukobwa wari wavutse agahita apfa.

Ibitangazamakuru bivuga ko umucuruzi witwa Hitesh Kumar Sirohi, yarokoye umwana muto w’umukobwa amuha amata akoresheje ipamba, nyuma uyu mwana ajyanwa mu bitaro byigenga.

Umuyobozi wa polisi muri aka gace SP Abhinandan Singh, yavuze ko mu cyumweru gishize ari bwo umugore wa Sirohi wari utwite yajyanywe kwa muganga nyuma yo kumva atameze neza. Yaje kubyara umwana w’umukobwa ku mezi arindwi aza gupfa mu minota mike.

Sirohi yagiye gushyingura uwo mukobwa we ariko aho yari agiye gucukura asanga harahinzwe ku ntera y’ibirenge nka bitatu. Igitiyo cye cyahise kigonga akabindi agakuramo asanga karimo umwana w’umukobwa uryamye.

Uyu mwana yari akiri muzima ariko guhumeka bimukomereye. Yahise ajyanwa ku bitaro kugeza ubu ubuzima bwe burimo kumera neza. Kugeza ubu uwakoze aya mahano ntabwo aramenyekana

SP Abhinandan Singh ati “Nyuma yo guhinga gato babonye akabindi bumva umwana arira. Bidatinze itsinda rya polisi ryarahageze umwana ajyanwa kwa muganga aho arimo kwitabwaho”.

Yakomeje avuga ko barimo kugerageza gushaka ababyeyi b’uyu mwana kandi nibamenyekana hazafatwa ibyemezo byo guhana abamushyinguye ari muzima.

Uyu mwana abaganga bamaze kumwita Sita. Arimo kuvurwa ariko ntabwo arakira neza.

Igitiyo cyahise gikubita akabindi karimo umwana w'umukobwa washyinguwe ari muzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza