U Buhinde: Ubushakashatsi bwagaragaje ko abarenga miliyoni 60 bagezweho na COVID-19

Yanditswe na Dufitumukiza Salathiel
Kuya 30 Nzeri 2020 saa 09:18
Yasuwe :
0 0

Inzego z’ubuzima mu Buhinde zatangaje ko ubushakashatsi bwakozwe ku rwego rw’igihugu bwagaragaje ko abarenga miliyoni 63 bashobora kuba baragezweho n’icyorezo cya Coronavirus. Iyi mibare iruta inshuro 10 itangazwa n’ubuyobozi bw’iki gihugu.

Ubushakashatsi bwakorewe ku bantu ibihumbi 29 bo mu duce tugera kuri 700 hirya no hino mu Buhinde, bwerekanye ko umuntu umwe muri 15 bari hejuru y’imyaka 10 afite umubiri urimo ubudahangarwa buzwi nka ‘antibody’.

Ubu bushakashatsi bwakozwe n’Ikigo gishinzwe gukora Ubushakashatsi mu Buvuzi cyo mu Buhinde, bukorwa kuva muri Kamena kugera muri Nzeri hagati.

Ubudahangarwa bw’umubiri buvubura ’antibody’, igihe hari icyo bwikanze gishobora kuwuhungabanya nka virusi n’ibindi.

Kuba ibizamini by’abaganga byagaragaza ko ’antibody’ iri mu mubiri, bivuze ko yavubuwe kubera ko hari virusi runaka wahanganye nayo. Ibi bikaba bivuze ko umwana umwe muri 15 bo mu Buhinde yanduye icyorezo cya COVID-19 ariko umubiri we ubasha guhangana nacyo.

Mu bantu miliyari 1.3 batuye u Buhinde, miliyoni 966 ni abafite imyaka 10 kuzamura, niba umwe muri 15 yaranduye Coronavirus, bivuze ko abangana na miliyoni 63.79 muri iki gihugu banduye iki cyorezo.

Hagendewe kuri ibi, iyi mibare igaragazwa n’Ikigo cyo mu Buhinde gishinzwe Ubushakashatsi mu Buvuzi ikubye inshuro nyinshi itangazwa na Leta kuko yo ivuga ko abanduye iki cyorezo barenga gato miliyoni esheshatu.

Ubu bushakashatsi bwagaragaje ko kandi buri bwandu butangazwa, haba hari abandi buri hagati ya 26 na 32 bubushamikiyeho ariko ntibumenyekane.

Hashingiwe kuri ubu bushakashatsi inzobere mu bijyanye n’ubuzima zivuga ko byaba byiza abatuye u Buhinde bakomeje kubahiriza amabwiriza yo kwirinda COVID-19 arimo kwambara agapfukamunwa, gukaraba intoki no guhana intera kuko bigoranye kumenya umubare wa nyawo w’abanduye iki cyorezo muri iki gihugu.

Kugeza ubu u Buhinde ni kimwe mu bihugu ku Isi byibasiwe na COVID-19, aho umubare w’abamaze kwandura iki cyorezo ugera kuri miliyoni esheshatu mu gihe abo kimaze guhitana barenga ibihumbi 97.

Ubushakashatsi bwerekana ko mu Buhinde abagera kuri miliyoni 60 bashobora kuba baragezweho na COVID-19 ahanini hashingiwe kuri 'antibody' zagaragaye mu mubiri wabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .