Ibice bimwe by’umurwa mukuru byashyizwe mu kato, hoherezwa abapolisi n’abagize izindi nzego z’umutekano ibihumbi. Internet ikoreshwa kuri telefoni yahagaritswe mu gace gakorerwamo ubucuruzi bwinshi, hanakingwa amasoko na sitasiyo nyinshi za gari ya moshi.

Abigaragambya bashinja Kumar guhindura urutonde rw’abatora mu buryo bavuga ko buha inyungu ishyaka Bharatiya Janata Party (BJP), riri ku butegetsi, rya Minisitiri w’Intebe Narendra Modi.

Ihuriro rya Cockroach ryari ryateguye guhuriza abantu ibihumbi ahitwa Jantar Mantar, rwagati muri Delhi, ariko inzego z’umutekano zahafunze mbere y’uko imyigaragambyo itangira.

Umukozi wa Minisiteri y’Umutekano w’Imbere mu Gihugu yabwiye Reuters ko abantu barenga 2000 bafunzwe muri Delhi. Ibitangazamakuru byo mu gihugu byatangaje ko abandi bagera kuri 400 bafatiwe muri Mumbai.

Nubwo ibikorwa byari byabujijwe, imyigaragambyo yabereye no mu tundi duce twa Delhi, harimo ku isoko ry’ubukorikori no ku rwibutso rwa Mahatma Gandhi.

Yogendra Solanki, umwe mu bigaragambyaga, yagize ati “Ibi birahonyora uburenganzira bw’abaturage kandi igihugu ntikizakomeza kubyihanganira.”

Ihuriro ryatangaje ko uwarishinze, Abhijeet Dipke, hamwe n’abayobozi baryo Saurav Das na Ashutosh Ranka, bafashwe indege barimo ivuye muri Mumbai ikigera muri Delhi.

Mu mashusho yatambutse kuri televiziyo, Dipke yabwiye abapolisi ati “Naje kugira ngo mfatwe, nimunfate […] Simbatinya.”

Iryo huriro ryamaganye ifatwa ry’abayobozi baryo, risaba ko barekurwa, rinatangaza ko rizakomeza imyigaragambyo kugeza Kumar yeguye.

Abanyapolitiki batavuga rumwe n’ubutegetsi na bamwe mu banyamakuru na bo bafashwe. Umunyamakuru wa Reuters yafashwe igihe gito, nyuma ararekurwa.

Izi mvururu zishingiye ku gushinja inzego zishinzwe amatora gukura amazina ku rutonde rw’abatora mu buryo butemewe, mbere y’amatora aherutse kuba muri leta zimwe.

Imyigaragambyo yakajije umurego nyuma y’uko Indian Express itangaje ko abandi bakomiseri babiri bari bagaragaje impungenge ku mpinduka zakozwe na Kumar, zakuyemo amazina agera kuri miliyoni 130.

Komisiyo y’Amatora na BJP byahakanye ko hari amakosa yakozwe. BJP ivuga ko intsinzi yayo ishingiye ku gukundwa kwa Modi n’iterambere ry’ubukungu.

Komisiyo ivuga ko mu bakuwe ku rutonde harimo miliyoni 63 bimukiye ahandi, miliyoni 30 batabonetse na miliyoni 28 bapfuye. Yongeyeho ko umuntu wese wemerewe gutora wakuwemo yibeshye ashobora kongera kwiyandikisha.

Amashyaka atavuga rumwe n’ubutegetsi avuga ko izo mpinduka zagize ingaruka ku byavuye mu matora BJP yatsinze. Rahul Gandhi, uyobora ishyaka Congress ritavuga rumwe n’ubutegetsi, yavuze ko abatavuga rumwe na Modi batazasubira inyuma. Ibi bibaye mbere y’amatora akomeye ateganyijwe muri leta zimwe, azatangira mu ntangiriro za 2027, mu gihe impaka ku rutonde rw’abatora zikomeje gukaza umurego.

Polisi yo mu Buhinde yafunze abantu barenga 2000 bari mu myigaragambyo