Umuntu wa mbere wahitanywe na Coronavirus hanze ya Aziya yaguye mu Bufaransa

Yanditswe na Twarabanye Venuste
Kuya 16 Gashyantare 2020 saa 01:42
Yasuwe :
0 0

Minisitiri w’Ubuzima mu Bufaransa, Agnès Buzyn, yatangaje ko Umushinwa wari urwariye Coronavirus mu bitaro byo muri icyo gihugu kuva mu mpera za Mutarama yitabye Imana.

Umushinwa w’imyaka 80 y’amavuko witabye Imana yagaragayeho Coronavirus ubwo yari mu bukerarugendo mu Bufaransa we n’umukobwa we. Urwo rupfu rubaye urwa mbere hanze ya Aziya n’i Burayi kuko izindi mpfu zabereye hanze y’u Bushinwa zabereye muri Philippines, Hong Kong no mu Buyapani.

Mu kiganiro n’itangazamakuru ku wa Gatandatu, Minisitiri Agnès Buzyn, yavuze ko uwitabye Imana yari arwariye mu Bitaro byitwa Bichat by’i Paris, kandi yari amaze iminsi arembye.

Umukobwa we w’imyaka 50 y’amavuko, na we ngo yanduye icyo cyorezo ariko ngo nta kibazo gikomeye afite ndetse azasezererwa vuba.

Mu Bufaransa hagaragaye abantu 11 barwaye Coronavirus. Bane muri bo barakize banasezererwa ku wa Gatatu w’icyumweru gishize. Batandatu bakomeje kwitabwaho cyakora ngo na bo nta bibazo bikomeye bafite.

Ku Mugabane wa Afurika, Misiri ni yo yabaye igihugu cya mbere kigaragayemo umurwayi wa Coronavirus ku wa 14 Gashyantare 2020.

Coronavirus yibasiye u Bushinwa ifata imyanya y’ubuhumekero igateza umusonga, yatumye ingendo zigana muri iki gihugu n’iz’imbere mu gihugu zihagarikwa, mu gihe inzego zinyuranye zikomeje gukora ibishoboka mu guhangana na yo.

Yagaragaye bwa mbere mu Ntara ya Wuhan mu Ukuboza 2019. Ku wa Gatandatu muri aka gace hagaragaye ubwandu bushya bwayo 2.420.

Icyorezo kimaze kugaragara ku bantu basaga 66 000 barimo abaganga 1.716 bahuye n’abarwayi bafite Coronavirus, mu gihe abasaga 1.500 imaze kubahitana mu Bushinwa.

Imibare yerekana ko abamaze gukira iyi ndwara bagasezererwa mu bitaro ari 6723. Gusa inzego z’ubuzima zikomeje kuburira abantu bamaze gukira iyo ndwara ko hariho ibyago ko bakongera kwandura.

Umuntu wa mbere wahitanywe na Coronavirus hanze ya Aziya yaguye mu Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .