U Bufaransa: Umuntu wa mbere yagaragayeho ubwoko bushya bwa Coronavirus

Yanditswe na Dufitumukiza Salathiel
Kuya 26 Ukuboza 2020 saa 11:19
Yasuwe :
0 0

Umufaransa wa mbere yasanganywe ubwoko bushya bwa Coronavirus ivugwaho kwandura vuba ku kigero cya 70% ugereranyije n’isanzwe.

Ni umuturage ufite ubwenegihugu bw’u Bufaransa ariko utuye mu Bwongereza, akaba yaragaragayeho aka gakoko gashya gatera COVID-19 kuwa 21 Ukuboza 2020, mu minsi ibiri gusa aturutse i Londres mu Bwongereza kuwa 19 Ukuboza.

Kuva muri Nzeri uyu mwaka mu Bwongereza havuzwe ko habonetse ubwoko bushya bwa Coronavirus yihinduranya ndetse yandura vuba ku gipimo cya 70% ugereranyije n’isanzwe, maze hatangira gukazwa ingamba z’ubwirinzi zirimo na guma mu rugo.

Ibihugu bitandukanye birimo Canada, u Bufaransa, u Bushinwa n’ibigize Umuryango wunze Ubumwe bw’ibihugu by’u Burayi, byahisemo gufunga ingendo ziva cyangwa zijya mu Bwongereza, mu rwego rwo kwirinda gukwirakwiza ako gakoko gashya.

Kuwa 23 Ukuboza nibwo u Bufaransa bworoheje ingamba bwemera ingendo ziva n’izijya mu Bwongereza, ariko ku baturage babwo basanzwe baba mu Bwongereza cyangwa Abongereza baba mu Bufaransa, ndetse hakomorerwa abashoferi b’imodoka zitwara ibicuruzwa, babanje kwipimisha.

Uretse u Bufaransa n’u Bwongereza, Coronavirus nshya yihinduranya yamaze kugaragara no mu bindi bihugu birimo Afurika Y’Epfo, u Buyapani, Denmark na Australie.

Abashakashatsi bavuga ko usibye kuba aka gakoko gashya kandura ku muvuduko uri hejuru, ntibirasobanuka neza niba gafite ubukana buruta ubw’agasanzwe, ndetse n’inkingo zamaze kwemezwa zishoboye guhangana nako.

Icyorezo cya COVID-19 cyadutse mu mpera za 2019 gihereye i Wuhan mu Bushinwa kimaze kwandura abasaga miliyoni 80.2, aho miliyoni 56.5 bamaze kugikira, naho abasaga miliyoni 1.8 kikabahitana

Umufaransa wa mbere wari uvuye mu Bwongereza yagaragaweho ubwoko bushya bwa Coronavirus (Ifoto: REUTERS/Stephane Mahe)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .