U Bufaransa bwarakajwe n’u Butaliyani bwabushinje gukomeza gukenesha Afurika

Yanditswe na Mukaneza M.Ange
Kuya 22 Mutarama 2019 saa 10:33
Yasuwe :
0 0

U Bufaransa bwarakajwe n’amagambo yavuzwe na Minisitiri w’Intebe wungirije w’u Butaliyani, Luigi Di Maio ashinja iki gihugu kuba kigikoloniza Afurika, bigatuma ihora mu bukene budashira.

Ibi byahise bituma Minisiteri y’Ububanyi n’Amahanga y’u Bufaransa ihamagaza ambasaderi w’u Butaliyani, Teresa Castaldo, ndetse itangaza ko atari ubwa mbere abayobozi ba kiriya gihugu bavuga amagambo adashobora kwihanganirwa.

Ku wa Gatandatu nibwo Di Maio wari wasuye agace ko hagati mu Butaliyani yibasiye u Bufaransa, avuga ko politiki y’iki gihugu iri mu bikomeje gukurura ibibazo by’urudaca muri Afurika.

Ati “Niba uyu munsi dufite abantu bakomeje kuva muri Afurika ni ukubera bimwe mu bihugu by’u Burayi, by’umwihariko u Bufaransa butigeze bureka gukoloniza Afurika.”

Yakomeje avuga ko iyo u Bufaransa buba budafite ibihugu bukoloniza, buba buri nko ku mwanya wa 15 mu bihugu bikize ku Isi, ariko kuri ubu buri mu myanya ya mbere kubera ibikorwa byabwo muri Afurika.

Ati “Nahagaritse uburyarya bwo kuvuga gusa ku ngaruka z’ibibazo by’abimukira, igihe kirageze ngo impamvu zibitera zivugweho.”

“Umuryango w’Ubumwe bw’u Burayi wagakwiye gufatira ibihano biriya bihugu nk’u Bufaransa bikomeje gukenesha ibihugu bya Afurika, bigatuma abantu bimuka.”

Reuters ivuga ko nubwo Castaldo yahamagajwe ku wa Mbere, Di Maio atigeze yisubiraho ku byo yatangaje, ahubwo nyuma y’amasaha make yongeye kuvuga ko u Bufaransa bukomeje kwifatira ku gakanu ibihugu 14 bikoresha ifaranga rya CFA.

Ati “U Bufaransa ni kimwe muri bya bihugu bikorera amafaranga ibihugu 14 bya Afurika bigatuma ubukungu bwabyo budatera imbere, ibi bigira uruhare mu kuba impunzi zihunga zigapfira mu nyanja cyangwa zikagera ku nkombe zacu.”

U Bufaransa bugaragaza ko ifaranga rya CFA rikoreshwa n’ibihugu bwakolonije, ryagize uruhare mu gutuma ubukungu bwabyo budahungabana.

Mu 2017 ariko Perezida Emmanuel Macron yavuze ko guverinoma arizo zikwiye kwihitiramo niba zahagarika gukoresha ifaranga rya CFA cyangwa zigakomeza kurikoresha.

Kuva mu Butaliyani hajyaho guverinoma nshya iyobowe na Giuseppe Conte, hakunze kumvikana guterana amagambo n’u Bufaransa by’umwihariko ku bibazo birebana n’abimukira na politiki y’iki gihugu muri Libya.

Luigi Di Maio yavuze ko politiki y'u Bufaransa muri Afurika iri mu bikomeje gukenesha uyu mugabane

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza