U Bufaransa: Batatu bishwe, abandi benshi bakomerekera mu gitero cyagabwe n’uwitwaje icyuma

Yanditswe na Jeannette Umutoni
Kuya 29 Ukwakira 2020 saa 03:20
Yasuwe :
0 0

Umuntu wari witwaje icyuma yishe abantu batatu anakomeretsa abandi bataramenyekana umubare, mu gitero cyagabwe mu rusengero ruherereye mu Mujyi wa Nice mu Bufaransa

Iki gitero cyagabwe mu masaha ya mbere ya saa sita kuri uyu wa Kane. Mu bapfuye harimo umukecuru n’umugabo wakaswe ijosi. Abo bombi bahise bagwa aho mu rusengero.

Umuntu wa gatatu wapfuye ni umugore wagerageje guhungira ahacururizwa ikawa hafi aho, wari watewe ibyuma inshuro nyinshi ariko nyuma aza gupfa.

Umuntu wabibonye ni we watabaje inzego z’umutekano akoresheje intabaza yashyizwe muri uwo mujyi, nk’uko byatangajwe n’itangazamakuru na Polisi y’iki gihugu, bagaruka ku gitero Meya w’uyu mujyi yise icy’iterabwoba.

Meya wa Nice, Christian Estrosi, yavuze ku rukuta rwe rwa Twitter ko iki gitero cyabereye muri mu rusengero rwa Notre Dame kandi ko Polisi yataye muri yombi uwakigabye.

Iki gitero kigabwe nyuma y’igihe gito u Bufaransa bukiri mu gahinda k’umwarimu wo mu mashuri yisumbuye, Samuel Paty wishwe akaswe umutwe n’umugabo ukomoka muri Chechnya.

Uwo mugabo yavuze ko uyu mwarimu yamuhoraga kuba yareretse abanyeshuri be ibishushanyo by’Intumwa y’Imana Mohamed, mu isomo ry’uburere mboneragihugu yigishaga.

Impamvu z’igitero cyagabwe i Nice ntizirasobanuka, gusa byibajijwe niba gifitanye isano n’ibishushanyo bya Mohamed abagize idini ya Islam bise ipfobya ry’imyizerere yabo.

Nyuma y’urupfu rwa Paty, abayobozi b’igihugu cy’u Bufaransa bashyigikiwe n’abaturage benshi bagarutse ku burenganzira bwo kugaragaza ibishushanyo, aho amashusho menshi yashyizwe hanze mu gushyigikira ibyo uyu mwarimu wishwe yari yakoze.

Ibi ntibyashimishije benshi mu bagize idini ya Islam ku isi, aho zimwe muri guverinoma zashinje Perezida w’u Bufaransa, Emmanuel Macron, kurwanya idini ya Isilamu.

Abapolisi benshi bahise boherezwa ahagabwe igitero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .