Trump yasabye ko Biden akorerwa isuzuma ry’ibiyobyabwenge mbere y’ibiganiro mpaka bazagirana

Yanditswe na Ndahayo Emmanuel
Kuya 27 Kanama 2020 saa 08:34
Yasuwe :
0 0

Perezida Donald Trump wa Leta Zunze Ubumwe za Amerika yasabye Joe Biden bazahangana mu matora, kubanza gufatisha ibipimo by’ibiyobyabwenge mbere y’uko batangira kugirana ibiganiro mpaka.

N’ubwo nta mpamvu zifatika yatanze, yavuze ko yitegereje agasanga imyitwarire ya Biden mu kuvugira imbere y’abantu no gukora ibiganiro mpaka yarateye imbere cyane, ku buryo akeka ko hifashishijwe izindi mbaraga.

Mu mwaka 2016 ubwo Trump yari ahanganye na Hillary Clinton, nabwo yashinje uyu mugore gukoresha ibiyobyabwenge, asaba ko bapimwa ariko uruhande rwa Clinton rurabyamagana.

Trump yavuze ko mu minsi ya mbere yo kwiyamamaza, Biden atarafite ubushobozi bwo kuvuga adatengwa imbere y’abantu, akamushinja kurwara ‘Dementia’.

Uburyo rero yahinduye ibintu mu gihe gito, akagira ubushobozi bwo kuvuga adategwa ndetse akanabasha kwitwara neza mu biganiro mpaka, ngo ni byo Trump atumva.

Yagize ati “sinzi ukuntu [Biden] utari ushoboye mu biganiro mpaka yahita yitwara neza ako kanya akitwara neza mu biganiro mpaka [byamuhuje na] Bernie [Sanders]”.

Yongeyeho ati “murabizi, nta kintu gitangaje cyabayeho. Kandi tugiye gusaba isuzumwa ry’ibiyobyabwenge kuko ntibishoboka – ntushobora kubikora kuriya”.

Aba bagabo bombi bategerejwe mu biganiro mpaka karundura bitatu bizaba mbere y’amatora ategerejwe ku wa 3 Ugushyingo.

Icya mbere kizaba ku wa 29 Nzeri muri Ohio, ikindi kibe ku wa 15 Ukwakira muri Nashville mu gihe ku wa 22 uko kwezi, ibya nyuma bizabera Tennessee.

Trump yari yasabye ko akanama gategura amatora kashyiraho ikindi kiganiro mpaka cy’inyongera, cyangwa se bakegeza imbere ikiganiro mpaka cya mbere, gusa ibi byose byatewe utwatsi.

Aba bagabo bombi bazahangana mu matora ya Perezida azaba ku wa 3 Ugushyingo 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .