Sobanukirwa byimbitse impamvu y’imyigaragambyo iri kuba muri Amerika

Yanditswe na Umwali Zhuri
Kuya 1 Kamena 2020 saa 07:46
Yasuwe :
0 0

Imyigaragambyo yadutse muri Leta Zunze Ubumwe za Amerika guhera mu cyumweru gishize, yatijwe umurindi n’urupfu rw’umugabo w’umwirabura, George Floyd, wishwe n’umupolisi muri Leta ya Minnesota mu Mujyi wa Minneapolis. Nubwo Derek Chauvin wamaze no kwirukanwa mu gipolisi akurikiranyweho icyaha cy’ubwicanyi gishobora gutuma afungwa imyaka 25, imyigaragambyo irakomeje umunsi ku wundi, kuko icyo abigaragambya bariho si urupfu rw’umuntu umwe, ni ubugizi bwa nabi bwa Polisi ya Amerika bumaze igihe kinini.

Hari ubushakashatsi bwakozwe ku bugizi bwa nabi bwa Polisi ya Amerika muri raporo yitwa “Mapping Police Violence” bwagaragaje ko 99% by’ibikorwa by’ubwicanyi bya Polisi ya Amerika kuva mu 2014 kugera mu 2019, ababigizemo uruhare batize bakurikiranwa ngo babihanirwe cyangwa ngo bahamwe n’icyaha.

Iyi raporo ikubiyemo amakuru yatanzwe n’inzego z’ubutabera muri Leta za Amerika, yerekana kandi ko umubare w’ibikorwa by’ubwicanyi bikorwa n’abapolisi, wagiye uzamuka buhoro buhoro kuva mu 2013 kugera mu 2019 aho nko mu 2014, abantu 1050 bishwe, byagera mu 2018 umubare ukiyongera bakagera ku 1143.

Iminsi 27 ni yo yonyine mu 2019 abapolisi bo muri Amerika batigeze bica umuntu

Ikindi kandi ni uko ubwo bwicanyi butibasira ubwoko bumwe gusa. Oya, amoko yose atuye muri Amerika yibasirwa n’abapolisi. Imibare igaragaza ubwicanyi bukorerwa abirabura muri Amerika igenda igabanuka ugereranyije n’ubwicanyi bukorerwa abazungu, abakomoka muri Amerika y’Amajyepfo (Latino) bo imibare ikaba yiyongera cyane. Abapolisi ntibatinya no kwica ba kavukire ndetse n’Abanyamerika bafite inkomoko muri Aziya. Ikiriho ubu, ni uko imibare y’abantu batazwi ubwoko bwabo ahubwo ariyo iri kuzamuka cyane mu bicwa.

Nko mu 2019, abirabura 259 bishwe na Polisi ugereranyije n’abazungu 406 ariko ba kavukire bo ni bake cyane kuko hishwe 13 gusa.

Iki ni ikigaragaza ko ubugizi bwa nabi bwa Polisi ya Amerika buhangayikishije Abanyamerika, ariko ubushakashatsi bugaragaza ko buri gihe abirabura aba aribo bafite ibyago byinshi byo kwicwa na Polisi uramutse ukoze ikigereranyo cy’abicwa ushingiye kuri miliyoni y’abaturage.

Nibura imibare igaragaza ko ibyago byo kwicwa ku birabura muri Amerika aba ari hafi inshuro ebyiri ugereranyije n’aba-Latino ndetse hafi inshuro eshatu ugereranyije n’abazungu.

Ikindi kandi muri ubwo bwicanyi bwose, abirabura baba bafite ibyago byo kwicwa badafite imbunda ku kigero cya 1.4 ugereranyije n’abazungu kuko bo aba ari kuri 1.2 ugereranyije n’Aba-Latino.

Mu mijyi umunani ya Amerika irimo Reno, Nevada, Oklahoma, Scottsdale na Arizona nibura ikigereranyo Polisi yicaho abirabura cyari hejuru y’ikigereranyo cy’ubwicanyi bukorerwa muri Amerika.

Ikindi kandi mu mijyi 25 muri 50 minini iri muri Amerika, ikigereranyo cy’ubwicanyi bwa polisi bukorerwa amoko yose kiri hejuru kurusha ibyaha by’ubugizi bwa nabi.

Mu mijyi myinshi ho nka Kansas, Missouri, Columbus na Ohio ubaze ubwicanyi bwa polisi nk’ibyaha by’ubugizi bwa nabi, byakuba inshuro ebyiri ibyaha by’ubugizi bwa nabi bihakorerwa.

Ibi ni ibituma Abanyamerika barambiwe imyitwarire ya polisi yabo bagahitamo kwigaragambya. Ni mu gihe imyigaragambyo nk’iyi imaze imyaka n’imyaniko iba, abantu bamagana ubwicanyi bukorerwa abirabura noneho batanafite n’imbunda.

Urugero rwibukwa cyane ni urupfu rwa Anthony Lamar Smith ufite inkomoko muri Afurika warashwe n’umupolisi witwa Jason Stockley n’urwo mu 2014 rwakorewe undi mwirabura witwa Michael Brown. Muri iyo myigaragambyo niho havuye intero yitwa “Black Lives Matter” ndetse hatangira n’ubuvugizi bwo kwamagana ibi bikorwa.

Ubushakashatsi butandukanye bwagiye bugaragaza ko izi ngamba zafashwe n’abirabura, zatumye ubwicanyi bukorwa na polisi bugabanuka aho “Mapping Police Violence” igaragaza ko bwaganutse ku kigero cya 22%.

Gusa ariko uko kugabanuka ntiguhagije. Abigaragambya ntibanyuzwe kuko ubushakashatsi bwakomeje kugaragaza ko nibura hagati ya 2013 na 2019, umwirabura umwe mu 1000 aba afite ibyago byinshi byo kwicwa na polisi. Kugira ngo ubyumve neza, ni umubare uruta ikigereranyo cy’Abanyamerika bashobora kwicwa nibura n’impanuka za moto.

Niba imyigaragambyo yabaye mu myaka yashize ntacyo yahinduye mu mitekerereze y’Abanyamerika, biragaragara ko n’iyi iri kuba ntacyo izatanga. Gusa abashinzwe kurengera uburenganzira bwa muntu, bavuga ko nta mpinduka zaba mu gihe cyose hadashyizweho amabwiriza aca intege polisi muri ibi bikorwa ku buryo atahindurwa n’umukuru w’igihugu uwo ariwe wese.

Ikindi ni uko polisi ntacyo ikora mu gukurikirana imyitwarire y’abagize uru rwego, urugero rwa hafi ni uko Chauvin wishe Floyd yari afite ibirego 18 bimuriho bigaragaza ubugizi bwa nabi, bigakubitana n’uko 99% by’abapolisi bica abantu badahanwa.

Polisi ya Amerika ishinjwa gukoresha imbaraga z'umurengera n'ubugizi bwa nabi mu gihe hari umwirabura ikekaho icyaha
Abirabura bakomeje gusaba ubutabera kubera bagenzi babo bagiye bicwa na Polisi mu bihe bitandukanye
Imibare igaragaza ko abapolisi bica abirabura, batajya bahanwa, igikomeye kibabaho ni ukwirukanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .