Putin yaciye amarenga y’uko azongera kwiyamamariza kuyobora u Burusiya

Yanditswe na Habimana James
Kuya 22 Kamena 2020 saa 04:28
Yasuwe :
0 0

Perezida w’u Burusiya, Vladimir Putin, yaciye amarenga ko azongera kwiyamamariza kuba perezida, mu gihe byaba byemejwe n’ivugurura ry’Itegeko Nshinga muri referendumu izaba tariki 1 Nyakanga uyu mwaka.

Kugeza ubu amategeko y’u Burusiya asanzweho, ategeka Putin kuva ku butegetsi mu 2024 igihe manda ye izaba irangiye.

Putin arimo kuyobora manda ye ya kane, aho yagiye aba ku myanya ya Perezida cyangwa Minisitiri w’Intebe, mu myaka 20. Itegeko Nshinga risanzwe ryamubuzaga kwiyamamariza manda ya gatatu yikurikiranya.

Impinduka zakozwe mu Itegeko Nshinga, ziramwemerera ko yakwiyamamariza manda ya gatanu ye mu 2024 ndetse n’iya gatandatu mu 2030 bivuze ko yazava ku butegetsi mu 2036.

Tariki 1 Nyakanga nibwo Abarusiya bazatora itegeko nshinga ry’igihugu kuva ryemezwa hashize imyaka 30.

Mu kiganiro cyatambutse ku cyumweru kuri televiziyo ya leta, Putin yagize ati “Murabizi, ndababwiza ukuri ubu: Mu gihe izi mpinduka mu Itegeko Nshinga zitabayeho, mu myaka ibiri, ndabizi nshingiye ku bunararibonye bwanjye, usibye ibisanzwe, akazi mu nzego zitandukanye z’ubuyobozi, buri wese azaba areba hirya no hino ushobora kuba umusimbura.”

Putin yakomeje avuga ko akazi gakwiye gukomeza nk’ibisanzwe aho gushaka umusimbura.

Umwe mu bantu ba hafi ba Perezida Putin, Andrei Klishas, yatangaje ko bishoboka ko Putin azakomeza kuyobora u Burusiya mu gihe Itegeko Nshinga ryaba rivuguruwe.

Ati “Iri vugurura rizadufasha gushyira ku ruhande ikibazo cy’abasimbura, ihererekanya ry’ubutegetsi n’ibindi.”

Putin yabaye Perezida w’u Burusiya mu 2000 muri manda ye ya mbere, yongera gutorwa mu 2004 muri manda ya kabiri. Irangiye mu 2008, Dmitry Medvedev niwe watorewe kuyobora igihugu kuko we atemererwaga gukomeza kwiyamamariza manda ya gatatu gusa Medvedev yahise amugira Minisitiri w’Intebe, bigeze mu 2012 anamutangaho umukandida atorerwa kongera kuyobora u Burusiya.

Mu 2018 yongeye kwiyamamaza muri manda ye ya kane izarangira mu 2024.

Ibyo wamenya kuri Putin: Putin: Intasi yahindutse Perezida utavugirwamo w’u Burusiya –Ikiganiro n’uwo baganiriye

Putin yaciye amarenga y’uko azongera kwiyamamariza kuyobora u Burusiya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .