00:00:00 IGIHE NETWORK KN KINYARWANDA EN ENGLISH FR FRANCAIS

Putin yaburiye Abanyaburayi ko umunsi umwe Amerika izabatererana

Yanditswe na Cyiza Joseph
Kuya 9 June 2024 saa 07:07
Yasuwe :

Perezida w’u Burusiya, Vladimir Putin, yavuze ko ubushotoranyi bw’abo mu Burengerazuba bw’Isi, bushobora kuzaba impamvu nyamukuru zizatuma iki gihugu kinini ku Isi gikoresha intwaro kirimbuzi mu kwirwanaho kandi ko zishobora kugira ingaruka kuri benshi, Leta Zunze Ubumwe za Amerika yigaramiye.

Ni amagambo Perezida Putin yagarutseho ubwo yari mu nama yagarukaga ku bukungu, inama yaberaga i Saint Petersburg.

Yasubizaga ikibazo uwari uyoboye ikiganiro witwa Sergey Karaganov yari amubajije, ku bijyanye n’ibikorwa bishotorana bikunze kugarukwaho n’Abanyaburayi.

Asa n’uburira Abanyaburayi babarizwa mu muryango w’ubutabarane, OTAN, Perezida w’u Burusiya, Vladimir Putin yavuze ko mu gihe uyu muryango wakomeza gukururira igihugu cye mu ntambara y’intwaro kirimbuzi, uzabyirengera.

Impamvu Perezida Putin ashingiraho ni uko ngo nibiramuka bibaye Leta Zunze Ubumwe za Amerika itazifatanya na bo muri urwo rugamba ahubwo izabatererana.

Ati “Abanyaburayi bagomba gutekereza neza niba mu bo ibitero kirimbuzi byageraho batarimo, niba Abanyamerika babaha intwaro zifatika cyangwa babatererana, kuba babafasha ndabishidikanyaho cyane.”

Impamvu abishidikanyaho ni uko mu gihe haba harashwe ibisasu kirimbuzi Amerika n’u Burusiya bifite ikoranabuhanga ribiburira ko hari ikibaye, Perezida akavuga ko ku bo muri OTAN bo mu Burayi atari uko bimeze.

Ati "Byongeye kandi, intwaro kirimbuzi z’u Burusiya zikubye inshuro eshatu cyangwa enye izo Abanyamerika bakoresheje mu bitero bya Hiroshima na Nagasaki".

Icyakora Perezida Putin yahumurije abantu, agaragaza ko atapfa na we gukoresha izo ntwaro kirimbuzi, ahubwo azazikoresha mu gihe hari uwabangamiye ubusugire bw’igihugu cye.

Ati "Nta mpamvu yo kuzana intwaro za kirimbuzi mu gihe ingabo n’inganda z’igisikare z’u Burusiya zikora neza kandi zifite ubushobozi kurusha abanzi bacu.”

Mu myaka ibiri ishize, Amerika n’abafatanyabikorwa bayo boherereje Ukraine ubufasha bwinshi mu bya gisirikare, bishimangira ko bashaka gutera u Burusiya mu buryo buziguye.

Mu byumweru bishize, abanyamuryango ba OTAN bakuyeho amategeko abuza Ukraine gukoresha intwaro zabo ku Burusiya, basaba ko ubutegetsi bwa Kyiv bwakwihorera ku Burusiya.

Bubonye ko ibyo bihugu bibigenje uko, u Burusiya nabwo bwatanze ubutumwa, bwategeka ko abasirikare bo ku birindiro bihana imbibi na Ukraine batangira imyitozo y’ikoreshwa ry’intwaro za kirimbuzi.

Perezida Putin yaburiye Abanyaburayi abasaba kwirinda kumusunikira ku ntwaro kirimbuzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .