Abapfakazi basizwe iheruheru na Jenoside yakorewe Abatutsi mu 1994 bibumbiye mu muryango Avega Agahozo, akarere ka Nyamasheke, barashimira leta idahwema kubafata mu mugongo bakaba bagenda barushaho kumererwa neza.

Ibi byatangajwe n’abayobozi b’uyu muryango ku rwego rw’Akarere, Imirenge n’Utugari bigize Akarere ka Nyamasheke, kuri uyu wa kabiri tariki ya 23/12/2015, mu nama yari igamije kurebera hamwe uko abanyamuryango babayeho, imbogamizi bahura nazo n’uko bakomeza kwiteza imbere binyujijwe mu mu mishinga iciriritse.

Aba bapfakazi ba jenoside batangaza ko ubufasha abahawe na Leta bwababereye umusingi wo kuba bameze neza kandi bafite isuku nk’uko byatangajwe na Kanakuze Marie Josée uhagarariye Avega mu Murenge wa Gihombo.

Agira ati “Leta yaradufashije turayishima, natwe tubona aho duhera twivana mu bwigunge, none ubu intego dufite ni ukudaheranwa n’agahinda kandi tugahorana isuku.”

Akomeza avuga ko bagira uruhare mu kubaka Igihugu bitabira gahunda rusange z’iterambere nk’umuganda n’ibindi.

Kampogo Costasie uhagarariye Avega ku rwego rw’Akarere we yishimira ko ihungabana ryagabanutse mu banyamuryango kugeza ku gipimo cya 95% ibi bigatuma bigirira n’icyizere bagakora imishinga yo kwiteza imbere.

Nubwo bamerewe neza ariko ngo haracyari imbogamizi nke zituma badatera imbere ku buryo bushimishije nko kuba hari abashyizwe mu byiciro by’ubudehe bidakwiranye n’ubushobozi bwabo, abandi bakaba bageze mu za bukuru kandi ari incike batagira ababitaho.

Umuyobozi w’Akarere wungirije ushinzwe imibereho y’abaturage Gatete Catherine, ashima abanyamuryango ba Avega ibyo babasha gukora n’imbaraga bakoresha, cyane cyane mu gutsinda agahinda no kubana neza n’ababahemukiye.

Uyu muyobozi kandi yababwiye ko Leta izakomeza kubaba hafi ikabafasha aho bishoboka ariko na bo bagakomeza kugira ibikorwa bibateza imbere.

Yagize ati “Kubafasha ni inshingano ariko ntabwo umwana avuka ngo ahite yuzura ingobyi, bityo ibibazo byose ntibyakemukira rimwe”.

Yakomeje avuga ko kuva Jenoside irangiye, abarokotse jenoside bagiye bahabwa ubufasha bunyuranye ariko hakitabwa ku bikenewe ku buryo bwihutirwa kandi ubufasha buracyakomeza.

Mu Karere ka Nyamasheke, abanyamuryango ba Avega bafite amatsinda 45, ari nayo bagiye baherwamo amahugurwa mu rwego rwo kubongerera ubumenyi ku gutegura imishinga no kuyicunga agera kuri 15 yamaze kubona inguzanyo. Ubu imishinga yabo yiganjemo ubucuruzi bw’ibiribwa n’amatungo magufi indi ikaba iyo korozanya inka ikaba ifite impinduka ku buzima bwabo.