Abahanga bagaragaje ibisabwa mu kuzahura ubukungu bw’isi bwazahajwe na Coronavirus

Yanditswe na Ndahayo Emmanuel
Kuya 29 Kanama 2020 saa 10:14
Yasuwe :
0 0

Ubukungu bw’Isi buri mu bihe by’ihungabana ridasanzwe. Ingamba zo guhangana na Coronavirus, zirimo gahunda ya guma mu rugo, ndetse no gushyira intera hagati y’abantu, zatumye imirimo myinshi ihagarara, ndetse na myinshi yakozwe inyungu iragwa, ku buryo ubukungu muri rusange bwazahaye mu bihugu hafi ya byose.

Nko mu gihembwe cya kabiri cy’uyu mwaka (Mata kugeza Kamena), ubukungu bw’ibihugu birindwi byibumbiye muri G7 ukuyemo u Bushinwa, bwaraguye ku kigero cy’amateka.

U Bwongereza nibwo bwibasiwe cyane muri ibyo bihugu, aho ubukungu bw’ubwo bwami bwaguye ku kigero cya 20.4%, u Bufaransa kuri 13.8%, u Butaliyani 12.4%, Canada 11.5%, u Budage 9.7%, Amerika 9.1 naho u Buyapani, bwagerageje kwirwanaho, bugira 7.8%.

U Bushinwa bwo bwagize izamuka ry’ubukungu riri ku kigero cya 11.5% ahanini bitewe n’uko iki gihugu cyafunguye ubukungu bwacyo mu gihe ibindi byari bikibasiwe na Coronavirus, byinshi biri muri gahunda za guma mu rugo.

Ni ryari ibintu bizasubira ku murongo?

Abahanga bemeza ko kugira ibintu bisubire ku murongo, bizasaba ko Isi ibona urukingo vuba, ariko naho rwaboneka, bishobora gutwara imyaka itari micye kugira ngo ibintu bisubire uko byahoze mbere ya Coronavirus, cyane cyane muri Afurika, ahasanzwe hanabarizwa umubare munini w’ibihugu bikennye.

Amaso yose ahanzwe urukingo, ariko na mbere y’uko ruboneka, abahanga bavuga ko zimwe mu ngamba zikwiriye gufatwa ubu mu rwego rwo kugerageza gusubiza ibintu ku murongo zirimo gukumira ko icyorezo cya Coronavirus cyakongera kubura umutwe mbere y’uko urukingo ruboneka.

Ibi byatuma ubukungu burushaho gukomera, ku buryo bwakubaka urufatiro buzazamukiraho igihe urukingo ruzaba rwabonetse. Mu gihe bitagenda gutyo, icyorezo kigakomeza gukwirakwira, ibyo bigira ingaruka ku myitwarire y’abantu ku bijyanye n’uburyo bakoresha amafaranga yabo, kabone n’ubwo Leta zakwinangira gufata ingamba za guma mu rugo.

Ikindi aba bahanga bavuga ni uko leta zigomba gukomeza gufasha ibigo n’abantu kubona amafaranga, yaba mu buryo bw’ubufasha cyangwa mu nguzanyo.

Ibi bituma bakomeza kugira ubushobozi bwo kugura, imwe mu ngingo zikomeye cyane zituma ubukungu bukomeza gutera imbere.

Ben May, umwe mu mpuguke z’ubukungu muri Kaminuza ya Oxford mu Bwongereza, avuga ko indi ngingo izasubiza ubukungu ku murongo mu buryo bwihuse ari icyizere abaturage bafitiye leta zabo cyo kubafasha guhangana na Coronavirus.

Iki cyizere ngo ni cyo gituma abaturage bisanzura bagakomeza ibikorwa byabo, naho iyo batizeye imikorere ya leta zabo mu guhashya Coronavirus, abenshi bahitamo kwifata no guhagarika ibikorwa kugira ngo bige neza aho ibintu bigana, kandi uko kwifata ni ko gutuma ibikorwa bibyara inyungu bihomba, bikarushaho gutuma ubukungu buhungabana.

Banki y’isi ivuga ko ubukungu bw’isi muri rusange buzagwa ku kigero cya 5.2% kubera ingamba zo kwirinda Coronavirus zafashwe n’ibihugu byinshi ku Isi, zikagira uruhare mu guhungabanya ibikorwa by’ubukungu n’ubucuruzi mpuzamahanga, n’ubwo nanone izi ngamba zari ngombwa mu kurengera ubuzima bw’abatuye Isi.

Abayobozi b'ibihugu bahangayikishijwe n'ihungabana rizaterwa na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .