Buramba Félicien ni umuhinzi w’urutoki rwa Kijyambere bwo mu bwoko bwitwa Fiya yagize ati “ Ubu nta soko dufite kuko ibitoki bya Fiya byaraduhombeye, abashoramari bari bafite inganda ziciriritse barazaga bakatugurira ibitoki bakabyengamo inzoga tukabona amafaranga n’ibitoki byacu bikagira agaciro, ariko kuri iyi saha inganda zimaze guhagaraga tubona fiya nta gaciro ifite kuko ibitoki birimo guhira mu rutoki tukabura aho tubijyana bigapfa ubusa.”

Umuyobozi wungirije w’akarere ka Ngoma ushinzwe ubukungu Rwiririza JMV, yatangarije TV1 ko ibyo bitoki abaturage bashobora kujya babyengamo urwagwa rusanzwe kuko nta kibazo cy’isoko gihari bitewe n’uko umusaruro w’ibitoki muri aka gace ukiri muke,gusa ngo bafunze inganda zakoraga inzoga zitujuje ubuziranenge.

Nubwo uyu muyobozi avuga ibi ariko, abahinzi b’urutoki bo barasaba ko bafiza kubona amasoko y’umusaruro wabo, kuko ngo bari barashishikarijwe kwitabira guhinga urutoki rwa kijyambere rwo mu bwoko bwa “Fiya” none ngo bakomwe mu nkokora n’uko ubu batari kubona isoko ry’umusaruro w’ibitoki byabo.

Ibitoki birimo kunekera mu mirima kubera kubura isoko ryabyo

Ibitoki byo mu bwoko bwa fiya ngo byabuze isoko nyuma y'ifungwa rya zimwe mu nganda zenga inzoga zitemewe