Minisitiri w’Intebe w’u Butaliyani yeguye kubera COVID-19

Yanditswe na Dufitumukiza Salathiel
Kuya 26 Mutarama 2021 saa 07:55
Yasuwe :
0 0

Minisitiri w’Intebe w’u Butaliyani, Giuseppe Conte, yeguye ku mirimo ye nyuma yo gushinjwa kujenjekera icyorezo cya Coronavirus kimaze guhitana abarenga ibihumbi 85 muri icyo gihugu.

Kuri uyu wa Kabiri tariki 26 Mutarama 2021 ni bwo Minisitiri w’Intebe Conte yashyikirije Perezida Sergio Mattarella w’u Butaliyani ubusabe bwe bwo kwegura, ndetse biravugwa ko uyu Mukuru w’Igihugu ashobora kumusaba gushyiraho guverinoma ikomeye.

BBC yatangaje ko Minisitiri w’Intebe Conte yeguye nyuma y’ibyumweru bibiri haje umwuka mubi hagati y’abagize guverinoma, ubwo Senateri Metteo Renzi wabaye Minisitiri w’Intebe w’icyo gihugu hagati ya 2014 na 2016, yavugaga ko adashyigikiye uburyo ari gukoresha amafaranga icyo gihugu cyagenewe n’Ubumwe bw’u Burayi mu guhangana na COVID-19.

Mu cyumweru gishize, Minisitiri w’Intebe Conte yagize amajwi make mu matora y’Inteko Ishinga Amategeko yo kwerekana icyizere afitiwe, aho umubare w’abasenateri bamushyigikiye wari hasi cyane.

Kuba umuyobozi wa guverinoma adashyigikiwe n’umubare munini w’abasenateri, byagaragaye nk’icyuho gikomeye muri politiki y’icyo gihugu.

Ibyo byatumye yegura kuri uwo mwanya, ubu akaba ari kuganira n’umuyobozi wa Sena, Elizabetta Casellati ngo harebwe igikorwa.

Nyuma y’iyegura rya Minisitiri w’Intebe Conte, Perezida ni we ugomba kugena ibikurikiraho. Yasabye abagize guverinoma gukomeza akazi kabo ndetse biteganyijwe ko ku wa 27 no ku wa 28 Mutarama ari bwo azagirana ibiganiro n’abayobozi bakuru b’ishyaka riri ku butegetsi, maze hagashyirwaho umusimbura.

U Butaliyani ni kimwe mu bihugu by’u Burayi byagizweho ingaruka zikomeye na Coronavirus. Ubu icyo gihugu gifite ubwandu bwa COVID-19 bungana na miliyoni 2.5, abagera kuri miliyoni 1.9 barayikize, naho abasaga ibihumbi 85 irabahitana.

Minisitiri w'Intebe w'u Butaliyani, Giuseppe Conte, yeguye ku mirimo ye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .