Minisitiri w’Intebe w’u Burusiya Dmitry Medvedev na Guverinoma yose beguye

Yanditswe na Evariste Nsengimana
Kuya 15 Mutarama 2020 saa 06:11
Yasuwe :
0 0

Minisitiri w’Intebe w’u Burusiya, Dmitry Medvedev, yatangaje mu buryo butunguranye ko we na Guverinoma beguye ku mirimo yabo nyuma y’uko Perezida Vladimir Putin atangaje ko agiye gukora amavugurura mu itegeko nshinga ry’iki gihugu.

Ni amavugurura yagombaga gufata inshingano zimwe zari zifitwe n’umukuru w’igihugu zigahabwa Inteko ishinga amategeko, ku buryo hagombaga no gushyirwaho Minisitiri w’Intebe mushya nk’uko Reuters yabitangaje.

Medvedev yatangaje ko yeguye kugira ngo ahe umwanya Perezida Putin abashe gukora impinduka zose akeneye mu itegeko nshinga.

Iyi nkuru itunguranye Minisitiri Dmitry Medvedev yayitangaje kuri Televiziyo y’igihugu nyuma y’ijambo ry’umwaka Perezida Putin (bari begeranye) yagezaga ku bagize Inteko Ishinga Amategeko y’iki gihugu kuri uyu wa 15 Mutarama 2020.

Mu bakandida bahabwa amahirwe yo kuvamo Minisitiri w’Intebe mushya harimo umuyobozi w’Umujyi wa Moscow, Sergei Sobyanin, Minisitiri w’Ubukungu, Maxim Oreshkin cyangwa Minisitiri ushinzwe ingufu, Alexander Novak.

Medvedev ni umuntu wa hafi wa Putin, yabaye Minisitiri w’Intebe w’u Burusiya kuva mu mwaka wa 2012. Mbere yaho yabaye Perezida w’u Burusiya mu gihe cy’imyaka ine, hagati ya 2008-2012.

Abatavuga rumwe n’ubutegetsi mu Burusiya bakomeje kuvuga ko impinduka Putin ashaka gukora, ari uburyo bwo kugira ngo azabashe gukomeza kuyobora u Burusiya ubwo manda ye izaba irangiye mu 2024.

Ibiro ntaramakuru by’u Burusiya, TASS, byatangaje ko Putin ateganya kugira Medvedev umuyobozi wungirije w’inama y’igihugu ishinzwe umutekano mu Burusiya.

Perezida Putin na Medvedev bakoranye igihe kirekire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza