Michelle Obama yahishuye ko arwaye agahinda gakabije

Yanditswe na Ndahayo Emmanuel
Kuya 6 Kanama 2020 saa 12:16
Yasuwe :
0 0

Michelle Obama, umugore wa Barrack Obama wabaye Perezida wa Leta Zunze Ubumwe za Amerika, yahishuye ko amaze igihe agaragaza ibimenyetso by’indwara y’agahinda gakabije, gatewe n’ibibazo byinshi biri kubaho muri ibi bihe.

Ibi yabigaragaje mu kiganiro gishya afite kinyura kuri Spotify. Mu gace kacyo ka kabiri, Michelle yaganiraga n’umunyamakuru Michele Norris. Michelle Obama yavuze ko ibihe bikomeye ari kunyuramo biterwa n’icyorezo cya Coronavirus, ihohoterwa ry’abirabura muri Amerika ndetse “n’uburyarya” bwa Leta ya Trump.

Yavuze ko ari kugorwa cyane no ‘kugenzura amarangamutima ye’ kandi kuyagenzura ‘bisaba kwimenya no kumenya ibigushimisha’. Yahishuye kandi ko muri iyi minsi afite ibibazo byo gukora imyitozo ngororamubiri, ndetse ajya akanguka mu ijoro hagati.

Yagize ati “Ibi si ibihe by’umunezero, ndabizi ko mpanganye n’ikibazo cy’agahinda kadatewe gusa n’ihagarikwa ry’ibikorwa kubera Coronavirus, ahubwo kanatewe n’ibibazo by’akarengane kari kugirirwa abirabura, ndetse no kwitegereza ubu buyobozi, ukareba uburyarya bwabo buri munsi, birababaje”.

Michelle ngo aterwa ‘ishavu’ no kubyuka buri munsi yumva inkuru y’abirabura bambuwe uburenganzira bwabo, bishwe, bashinjwe ibinyoma n’ibindi.

Ati “Byatumye numva ndemerewe cyane kurusha ikindi gihe icyo ari cyose mu buzima bwanjye”.

Mu rwego rwo kurwanya aka gahinda, yavuze ari kugerageza gukora ibimushimisha.

Mu gace ka mbere k’ikiganiro gishya cya Michelle Obama, yari yakiriye umugabo we Barrack Obama, wabanjirije Trump kwicara muri White House.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .