Macron ukomeje kotswa igitutu n’abaturage yahinduye guverinoma

Yanditswe na Mukaneza M.Ange
Kuya 17 Ukwakira 2018 saa 10:46
Yasuwe :
0 0

Nyuma y’umwaka n’igice ku butegetsi, Perezida w’u Bufaransa, Emmanuel Macron, wakomeje kotswa igitutu kubera ibibazo birimo n’imyigaragambyo yahinduye guverinoma.

Ku wa Kabiri nibwo Macron yahinduye Guverinoma, mu rwego rwo kongera gushakisha uko yagarurirwa icyizere n’abaturage batigeze bishimira amavugurura yagiye akora.

Mu ijambo yagejeje ku baturage nyuma yo guhindura guverinoma, Macron yavuze ko azi ibishimisha, ibyifuzo, n’ibitera umujinya Abafaransa kandi yiteguye gukora ibishoboka byose ngo bose banogerwe.

Ubushakashatsi bwakozwe muri Nzeri bwagaragaje ko 29% gusa by’Abafaransa bishimira ibyo amaze kubagezaho, ni mu gihe Kanama yari yarangiye bari kuri 34%.

Uku kumanuka kw’abamwishimira byatewe n’imyigaragambyo y’abatarishimiye amavugurura yakoze mu birebana n’ubukungu azasiga abasaga ibihumbi 120 bakuwe mu mirimo ya Leta n’uburyo yitwaye mu kibazo cya Alexandre Benalla wari ushinzwe umutekano we.

Muri Nyakanga Benalla yafashwe amashusho ari gukubita abaturage bari mu myigaragambyo ku munsi w’abakozi yambaye ingofero ya polisi, ibintu byatumye yirukanwa.

Nyuma y’aho haje gushyirwa hanze ifoto y’uyu musore w’imyaka 26 afite imbunda, iyi yafashwe igihe Macron yari mu bikorwa byo kwiyamamariza kuba perezida.

CNN dukesha iyi nkuru ivuga ko Macron yanahuye n’ibindi bibazo birimo kwegura kwa bamwe mu ba Minisitiri bakomeye barimo Nicolas Hulot wari ushinzwe ibidukikije, washinjaga perezida kunanirwa guhangana n’ikibazo cy’imihindagurikire y’ibihe.

Gerard Collomb wari Minisitiri w’umutekano nawe yahisemo kwegura, asubira kuyobora Umujyi wa Lyon. Muri guverinoma nshya uyu mwanya washyizweho Christophe Castaner wari umuyobozi w’ishyaka La République en Marche rya Macron.

Bamwe mu bahatanye na Macron mu matora, barimo Jean-Luc Mélenchon na Marine Le Pen, bamushinja gushyiraho politiki zigamije gukomeza guteza imbere abifite.

Mu bandi ba minisitiri bashya binjiye muri guverinoma harimo Jacqueline Gourault, ushinzwe uduce twometse ku Bufaransa wasimbuye Jacques Mézard, Minisitiri w’Umuco, Franck Riester, waje asimbura Françoise Nyssen wavuzweho kutabasha gutandukanye inyungu za leta n’izi nzu ye y’ubwanditsi ya Actes du Sud.

Undi mushya winjiye muri guverinoma ikiyobowe na Edouard Philippe ni Didier Guillaume wagizwe Minisitiri w’ubuhinzi asimbuye Stéphane Travert na Agnès Pannier-Runacher wagizwe Umunyamabanga wa Leta muri Minisiteri y’ubukungu n’imari, umwanya wariho Delphine Gény-Stephann.

Macron yavuguruye Guverinoma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza