Kim Jong Un yaba amaze igihe ari muri Coma

Yanditswe na Ishimwe Alain
Kuya 24 Kanama 2020 saa 08:04
Yasuwe :
0 0

Umuyobozi wa Koreya ya Ruguru, Kim Jong Un, ashobora kuba amaze iminsi arembye ari muri Coma, aho bivugwa ko yagize ikibazo gikomeye nyuma yo kubagwa umutima muri Mata uyu mwaka.

Kim Jong Un yagaragaje ibibazo by’ubuzima inshuro nyinshi, aho umubyibuho ukabije, indwara y’umutima, kunywa itabi n’inzoga byinshi ngo biri mu byakomeje kugira ingaruka mbi ku buzima bwe.

Amakuru avuga ko ahagana muri Mata, uyu mugabo w’imyaka 36 yabazwe umutima ariko ngo ntibyagenda neza.

U Bushinwa bwohereje inzobere mu Koreya ya Ruguru bikekwa ko zigiye kwita ku buzima bwa Kim umaze imyaka icyenda ku buyobozi bw’icyo gihugu.

Ni nyuma kandi y’uko byakomeje guhwihwiswa ko yanapfuye, usibye ko byaje guhakanwa n’inzego zose, zirimo n’ubutasi bwa Koreya y’Epfo zisanzwe zikurikirana bya hafi ibibera muri Koreya ya Ruguru.

Hagati aho, Koreya ya Ruguru yagaragaje amafoto ya Kim Jong Un ari mu bikorwa birimo inama n’ibindi, gusa amakuru atangazwa na Chang Song-min, umwe mu bafite ubunararibonye muri politiki ya Koreya ya Ruguru, yatangaje ko ayo mafoto yose ari amahimbano kuko Kim Jong Un arwaye cyane ku buryo adashobora kujya mu bikorwa ibyo ari byo byose.

Impungenge ku buzima bwa Kim kandi ziyongereye mu minsi ishize, bimaze gutangazwa ko yahaye ubutware mushiki we Kim Yo Jong, bwo gufata ibyemezo bikomeye bireba igihugu. Bivugwa ko nta buryo bwateguwe Kim yasimburwamo aramutse apfuye, akaba ari yo mpamvu mushiki we yazamuwe mu ntera.

Byavuzwe ko Jong ari we wategetse isenywa ry’inzu yaberagamo imishyikirano hagati ya Koreya y’Epfo n’iya Ruguru.

Ikinyamakuru Daily NK kivuga ku makuru ya Koreya ya Ruguru cyatangaje ko uyu mugore w’imyaka 32 ashaka gushimangira ubukaka bwe yifashishije Koreya y’Epfo, mu rwego rwo kwemeza abasirikare bakuru basanzwe badacana uwaka n’icyo gihugu.

Perezida Kim Jong Un amaze iminsi arwaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .