Kanye West agiye gusangira na Donald Trump

Yanditswe na Mukaneza M.Ange
Kuya 10 Ukwakira 2018 saa 02:41
Yasuwe :
0 0

Umuraperi Kanye West agiye gusangira no kuganira na Perezida wa Leta Zunze Ubumwe za Amerika, Donald Trump, nyuma y’iminsi aba bombi bagaragaza kumvikana bidasanzwe.

Ku wa Kane nibwo Kanye West azakirwa na Trump muri White House, aho bazaganira ku birebana n’amavugurura ku mikorere ya gereza.

Umuvugizi wa White House, Sarah Sanders, yavuze ko bazaganira ku birebana no kuzahura imirimo yo mu nganda muri Amerika n’ivugururwa ry’itegeko rirebana n’amagereza.

Nk’uko Reuters yabyanditse, aba bombi bazanaganira kandi ku guca urugomo rufitanye isano n’udutsiko no kurwanya ubugizi bwa nabi mu Mujyi wa Chicago aho Kanye West akomoka.

Kanye West agiye guhura na Trump nyuma y’uko muri Gicurasi yifashishije Twitter mu kumushimagiza ahamya ko yabashije gukora ibyo bumvaga bidashoboka.

Yagize ati “Ntabwo ari itegeko ko buri wese ahamanya na Trump ariko ako gatsiko ntabwo katuma ntamukunda […] Ni umuvandimwe wanjye. Nkunda buri wese. Ntabwo nemeranya n’ibyo buri wese akora. Icyo ni cyo kitugira abantu batandukanye. Kandi buri wese afite uburenganzira bwo kugira ibitekerezo bye ku giti cye.”

Trump nawe ashima Kanye West aho avuga ko ari umugabo uzi ubwenge, ubona ndetse agaha agaciro ibyo ubutegetsi bwe bukorera abirabura bo muri Amerika.

Kanye West agiye guhura na Trump, nyuma y’uko n’umugore we, Kim Kardashian ahuye na Perezida bakagirana ibiganiro byasize Alice Marie Johnson wari warakatiwe gufungwa burundu kubera ibiyobyabwenge afunguwe nyuma y’imyaka 20 mu gihome.

Perezida Trump na Kanye West i New York

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza