00:00:00 IGIHE NETWORK KN KINYARWANDA EN ENGLISH FR FRANCAIS

Impamvu Umwami Charles yarahiriye kurinda Itorero rya Presbytérienne

Yanditswe na Igizeneza Jean Désiré
Kuya 24 Nzeri 2022 saa 02:19
Yasuwe :

Hari ku itariki ya 10 Nzeri 2022 ubwo Umwami Charles III yemezwaga nk’Umwami w’u Bwongereza mu muhango wabereye i Londres, aturwa Imana anasabirwa kuzuzuza inshingano ze zo kuyobora ubu bwami.

Ubusanzwe mu muco w’Abongereza umuhango wo kwemeza umwami ubanziriza uwo kumwimika. Niyo mpamvu kwimika Umwami Charles III bishobora no kuzaba mu mwaka utaha mu gihe kumwemeza byamaze kurangira.

Ni ubwa mbere mu mateka y’ubwami bw’u Bwongereza uyu muhango watambukijwe kuri televiziyo mu buryo bw’imbonankubone.

Bwa mbere uyu muhango ubaho hari mu 1603 ubwo Umwami James VI wa Ecosse yabaga Umwami James I w’u Bwongereza nyuma yo kwihuza kw’ibihugu byombi.

Mu ndahiro y’Umwami Charles III humvikanyemo ko agomba kurinda Itorero ryo muri Ecosse, Presbytérienne ariko bamwe ntibabisobanukirwa.

Byateye urujijo ku bantu basanzwe bazi ko Itorero ry’Abongereza ari Anglican hibazwa niba byari ngombwa ko kurinda irindi torero abishyira mu ndahiro.

Gusa ibi bifite aho bihuriye n’amateka y’u Bwongereza ajyanye n’Intambara yahuje iki gihugu na Ecosse mbere gato y’iyahuje ab’i Bwami n’abo muri Guverinoma izwi nka (English Civil War) yabaye mu myaka ya 1640.

Mu binyejana bya 16 na 17, Ecosse yari igihugu gitandukanye n’u Bwongereza na nyuma y’uko Umwami James I yima ingoma mu 1603 byakomeje kuba gutyo.

N’ubwo byakomeje gutandukana, u Bwongereza, Ecosse na Irelande byakomeje kujya bisangira Ingoma mbere y’uko byihuza ngo bikore u Bwami bw’u Bwongereza (United Kingdom).

Mu 1637 abayobozi bakuru barimo na James I bahatiye Itorero rya Ecosse gukoresha amahame y’igitabo ‘Book of Common Prayer’. Ni igitabo cyari gikubiyemo amahame y’Itorero rya Anglican nk’idini ry’u Bwongereza.

Abo muri Ecosse ntabwo babyumvise neza ahubwo byazamuye umwuka mubi cyane. Byatewe n’uko bashinjaga abo mu bwami bw’u Bwongereza kugerageza kuzana imigenzo yo mu yandi matorero mu itorero ryabo.

Babifataga nko guhuza Itorero rya Anglican n’irya Presbytérienne, itorero bavugaga ko barazwe n’abasokuruza babo.

Ikindi bavuga ko Itorero ryabo ridakwiriye kugira uriyobora nk’umuyobozi mukuru kuko bavugaga ko Yezu ariwe muyobozi wabo w’Ikirenga nta wundi bakeneye.

Ibitandukanye no muri Anglican kuko abo muri Ecosse bavugaga ko riyoborwa n’Abayobozi b’Itorero (bishops).

Mu 1638 abo mu bwami bwa Ecosse n’abo mu bakomeye b’abacuruzi bo muri icyo gihugu basinye amasezerano yemezaga ko bakwiriye guhindura imwe mu migenzo y’Itorero ryabo. Banzuye ko nta muyobozi mukuru itorero ryabo ryagombaga kugira.

Ibi byazamuye intambara n’amakimbirane hagati yabo n’Abongereza ku bijyanye n’aba bakuru b’amatorero kuko Abongereza bashakaga ko Itorero rya Presbytérienne ryitwara nk’iryabo cyane cyane mu migenzereze.

Byarangiye Umwami Charles I yemeye ko Itorero ry’abo muri Ecosse rizatandukana byeruye n’irya Anglican n’ubwo ibihugu byo byayoborwaga n’Umwami umwe.

Byarakomeje kugera mu 1707 aho noneho hemejwe ko Ecosse, u Bwongereza bihuzwa bigakora icyiswe ‘Great Britain’.

Ni naho Inteko Ishinga Amategeko ihuza ibi bihugu byombi yagombaga guhurira bwa mbere i Westminster.

Byasize Itorero rya Presbytérienne rihawe ubwigenge busesuye ndetse n’amasezerano y’ubwihuze bw’Ibi bihugu byombi (Acts of Union) bubishimangira bidasubirwaho.

Kuva ubwo kugeza n’ubu Umwami cyangwa Umwamikazi wese iyo arahirira kuyobora Ubwami bw’u Bwongereza agomba gushyiramo ko azabungabunga imyizerere ya Porotesitanti muri Ecosse no kurinda Itorero rya Presbytérienne by’umwihariko.

Ni itorero ryigenga kugeza uyu munsi ndetse ryubashywe ku buryo bigoranye kumvisha abizera baryo ko bagomba gusengera muri Anglican.

Ryemera Yezu nk’Umuyobozi mukuru waryo ndetse buriya ntabwo Umwami Charles III yiswe Umuyobozi mukuru waryo nk’uko bimeze ku Itorero rya Anglican.

Bigaragara iyo agiye muri Ecosse bikaba ngombwa ko asenga, afatwa nk’umwizera usanzwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .