00:00:00 IGIHE NETWORK KN KINYARWANDA EN ENGLISH FR FRANCAIS

Igisirikare cy’u Bushinwa cyamuritse ‘robot’ ihetse imbunda

Yanditswe na Ayera Belyne
Kuya 29 May 2024 saa 05:28
Yasuwe :

Igisirikare cy’u Bushinwa cyerekanye ‘robot’ yahawe ishusho y’imbwa ihetse imbunda cyiteze ko izajya igifasha mu ntambara kuko ifite ubushobozi bwo gutahura aho umwanzi aherereye ndetse ikaba yanabafasha mu kurasa.

Iyi ‘robot’ izajya ikoreshwa n’umuntu hifashishijwe ‘télécommande’. Yagaragaye ubwo igisirikare cy’u Bushinwa cyifatanyaga n’icya Cambodge mu myitozo yahawe izina rya ‘Golden Dragon 2024’.

Nk’uko ikinyamakuru Global Times cyabisobanuye, iyi ‘robot’ yagaragaye mu mashusho y’iminota ibiri igenda, iryama hasi ndetse isubira inyuma, ikoreshejwe n’umuntu ufite ‘télécommande’.

Gukoresha ‘robot’ ndetse n’utudege tutagira abapilote bimaze kumenyerwa mu gisirikare cy’u Bushinwa kuko mu Ugushyingo 2023 na bwo cyarabikoresheje ubwo cyifatanyaga n’ibindi bihugu by’inshuti mu myitozo. Ibi bihugu birimo Malaysia, Thailand na Vietnam.

Ni igikorwa kigaragaza iterambere ibisirikare by’ibihugu birimo u Bushinwa bimaze kugeraho, ryabifasha kurwana intambara zo mu bihe bigezweho.

Uburyo bwo gukoresha ‘robot’ kandi ntabwo bukoreshwa n’u Bushinwa gusa, kuko mu 2020 ingabo za Amerika zirwanira mu kirere zagaragaje uburyo zakoresheje ‘robot’ imeze nk’iyi ziteganya gukoresha ku rugamba, izifashishwa mu kumenya amakuru ku mwanzi, kubika amakuru y’igisirikare ndetse no mu gutekereza byihuse.

Muri iki gihe cy’iterambere, usanga ibihugu byinshi na byo byarateye intambwe yo gushyira ikoranabuhanga mu mirwanire. Si ‘robot’ gusa kuko bisanzwe bikoresha izindi ntwaro zigezweho zirimo utudege tutagira abapilote tuzwi nka ‘drones’.

Utu dutege twagaragaye mu gihe cy’intambara y’u Burusiya na Ukraine. Ni intwaro byagaragaye ko ihendutse kandi ishobora gutanga umusaruro ku rugamba nko gusenya imodoka z’imitamenwa, ari na ko ubuzima bw’abasirikare budakomeza gutikira kuko ntibaba bakijya kwishora mu masasu.

U Bushinwa ni kimwe mu bihugu byagurishaga ‘drones’ nyinshi ku Isi ariko mu 2023 bwafashe icyemezo cyo kugabanya izo bwoherezaga mu mahanga mu rwego rwo kuzizigama kugira ngo hagize igihungabanya umutekano wabwo, buzashobore kuzikoresha bwirwanaho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .