Ibyo wamenya ku bihano Amerika yasubirijeho Iran

Yanditswe na David Eugène Marshall
Kuya 5 Ugushyingo 2018 saa 04:10
Yasuwe :
0 0

Kuri uyu wa Mbere tariki 5 Ugushyingo, nibwo Leta Zunze Ubumwe za Amerika zongerereye ibihano by’ubukungu kuri Iran bisanga ibyo zasubijeho, nyuma yo kwikura mu masezerano yatumye Iran idohorerwa ku byo yari yarafatiwe izira kwikungahaza ku ngufu za kirimbuzi.

Ni ibihano byibanda ku bucuruzi bwa peteroli Iran igurisha hanze n’urwego rw’ubukungu, mu gihe cyari mu bicukura peteroli nyinshi ku isi.

Ibihano Amerika yasubijeho kandi bishyira u Burayi mu ihurizo, nk’umwe mu bafatanyabikorwa mu bucuruzi na Amerika kandi bwo bugikurikiza ayo amasezerano Amerika yikuyemo.

Ibyo bihano biteye bite?

Biteganywa ko gucuruzanya peteroli n’ibigo biyigurisha byo muri Iran bizaba bibujijwe, kimwe n’inzego ziyishamikiyeho zaba ubwishingizi cyangwa ubwikorezi.

Mu bukungu, ibikorwa byo guhererekanya amafaranga Banki Nkuru ya Iran yagiranaga n’andi ma Banki ku isi birabujijwe.

Ni ibihano bitoroheye Leta ya Iran isarura mu bucukuzi bwa peteroli 80% by’amafaranga yose yinjira, 60% by’ingengo y’imari ikoreshwa ikaba ari naho iva.

Ni ibihe bihano Iran yari isanganwe?

Ubwo Amerika yikuraga mu mugambi w’amahoro na Iran kuwa 8 Gicurasi, yari yatanze iminsi 60 ntarengwa ku nshuti zayo ngo zive mu bucuruzi n’iki gihugu, irangira ku wa 6 Kanama 2018.

Kuva ubwo, Iran ntiyari yemerewe gukoresha Idolari rya Amerika, rikoreshwa mu ivunjisha mpuzamahanga mu bucuruzi bwayo.

Kuva ubwo kandi inganda zikora imodoka n’amatapi, nka bimwe mu bigize nkingi ya mwamba ku nganda zo muri Iran zafatiwe ibihano, byanahungabanije itumizwa ry’ibyuma bikoreshwa mu gukanika indege no gusimbuza ibishaje.

Ni ibihano bifite iyihe ntego?

Ikivugwa cyane n’ubutegetsi bwa Donald Trump ni uko ibi bihano bigamije gushyira igitutu ku bategetsi ba Iran, ngo bahindure imyifatire.

Ku itariki ya 21 Gicurasi, Umunyamabanga wa Leta wa Amerika ushinzwe Ububanyi n’amahanga, Mike Pompeo yashyize hanze ingingo 12 zagombaga kubahirizwa na Iran kugirango ibyo bihano bikurweho.

Muri izo ngingo, izazaga imbere kwari ugusaba Iran guhagarika nta mpaka porogaramu yayo ya misile, kureka gutera inkunga imitwe y’ibyihebe nka Hezbollah, Hamas, ndetse na Palestinian Islamic Jihad.

Pompeo yongeyeho ko Iran yagombaga kuvana ingabo zayo muri Syria, ndetse ikanambura intwaro intagondwa z’aba-Shiite birwanira muri Irak.

Ubumwe bw’u Burayi bushobora kwihagararaho?

Muri Nzeri uyu mwaka wa 2018, ushinzwe ububanyi n’amahanga mu Bumwe bw’u Burayi, Federica Mogherini yatangaje ko Ubumwe bw’u Burayi bwateguye gahunda y’uko buzakorana ubucuruzi na Iran, bwise Special Purpose Vehicle, SPV mu magambo ahinnye y’Icyongereza.

Ubwo buryo ngo bushobora kuzibanda ku kugurana ibicuruzwa na Iran aho gukoresha amafaranga, aho abanyaburayi bazajya boherereza imyenda, Iran nayo yohereze Peteroli nk’ingurane.

Ni uburyo bugishidikanywaho na benshi kuko hatarasobanuka uko buzakora, hamwe ngo bushobora no gutwara igihe.

Bimwe mu bihugu byo mu Muryangi w’Ubumwe bw’u Burayi kandi ngo byikanga ko mu gihe ubu buryo bwakwifashishwa, bishobora gukongeza umujinya wa Amerika.

Kuri iyi ngingo, umujyanama wa Doland Trump mu by’umutekano Richard Bolton yagize ati “Amerika ntizihanganira uwo ari wese uzashaka kurogoya ibi bihano, ndetse n’u Burayi ntituzabwemerera.”

Ni izihe ingaruka ibihano byari bisanzwe byagize kuri Iran?

Ku ikubitiro, ifaranga rya Iran ryahatereye agaciro ku kigero cya 70% muri uyu mwaka, hamwe n’ibiciro ku isoko muri Iran bizamuka ku kigero gikabije.

Ubucuruzi bw’ibikomoka ku ngufu muri Iran kandi bwatakaje hafi kimwe cya gatatu guhera muri Kamena uyu mwaka.

Ibigo byo mu Burayi byari byaragiye gushora imari muri icyo gihugu, guhera muri Gicurasi uyu mwaka byatangiye gukuramo akarenge kubera gutinya ko Amerika ishobora kuzabangamira ubucuruzi bwabyo.

Urwego rwashegeshwe cyane kurusha izindi ngo ni urw’imiti yatumizwaga mu Burayi, ubu isigaye ibona umugabo ugasiba undi, cyane cyane ikenerwa n’abageze mu za bukuru.

Deutsche Welle yatangaje ko byanze bikunze Iran bizayifata igihe kugira ngo ihangane n’ibihano yafatiwe na Amerika, mu mugambi Iran yise ‘Kubaka ubukungu bugamije kwihagararaho’.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .