00:00:00 IGIHE NETWORK KN KINYARWANDA EN ENGLISH FR FRANCAIS

Ibikomoka kuri peteroli by’u Burusiya biri kugurishwa i Burayi binyujijwe mu Buhinde

Yanditswe na Igizeneza Jean Désiré
Kuya 13 Ugushyingo 2022 saa 05:42
Yasuwe :

Mu gihe ibihugu byo mu Burengerazuba bw’Isi byamaze gufungira amayira ibikomoka kuri peteroli biva mu Burusiya mu buryo butaziguye, u Buhinde bukomeje kugurisha ibi bihugu iyo bukura i Moscow, kandi bikayifatira ku biciro bihanitse.

Leta zunze Ubumwe za Amerika na Canada byamaze kugaragaza ko bitazigera byakira ibikomoka kuri peteroli biva mu Burusiya, kubera intambara bwashoje kuri Ukraine.

Ni mu gihe ibihano bwafatiwe n’Abanyaburayi ku bikomoka kuri peteroli, byo bizatangira gukurikizwa ku wa 5 Ukuboza 2022.

Ibi bihugu bimaze gushyiraho ibi bihano, byashatse ubundi buryo byabonamo lisansi biyikuye mu bihugu bindi biyitunganya, birimo u Budage, u Buhinde n’ibindi.

U Buhinde bwahise bubyungukiramo kuko lisansi bukura mu Burusiya buri kuyigurisha ibi bihugu ku giciro kiri hejuru, cyane ko iki gihugu cyo muri Aziya ari n’icya gatatu ku Isi mu bigurisha ibikomoka kuri peteroli.

Nk’urugero, ibigo bigurisha lisansi ku rwego rw’Isi bya Vitol na Trafigura, biherutse gutangaza ko lisansi byaguze mu Kigo gitunganya ibikomoka kuri peteroli cya Nayara cyo mu Buhinde, akagunguru kamwe kazamutseho kuva ku 10$ kugeza kuri 15$, ugereranije n’iyo bakura i Dubai.

Reuters yanditse ko amakuru ifite ari uko ibi biciro ari na byo bizagenderwaho kuri lisansi iteganyijwe kujya muri Amerika n’u Burayi, inyuze ku cyambu cya Vadinar cyo mu Buhinde.

Ingano ya lisansi iva mu Buhinde ijya muri Amerika yazamutse muri uyu mwaka, kuko mu mwaka washize imibare y’ikigo Vortexa gitanga amakuru ku bijyanye n’ibikomoka kuri peteroli, igaragaza ko mu 2021 indege (cargo) imwe y’utugunguru twa Lisansi ari yo yerekeje i Washington.

Amavuta ya VGO (Vacuum Gas Oil) akoreshwa cyane n’ibigo bitunganya ibikomoka kuri peteroli mu gukora gasoline na diesel. U Burusiya nibwo bwa mbere bwayagemuraga ku nganda zo muri Amerika mbere y’Intambara ya Ukraine, ari nayo mpamvu ubu bari kuyagura ku giciro kiri hejuru.

Ibihano Amerika n’Umuryango w’Ubumwe bw’u Burayi byafatiye u Burusiya ntabwo bireba lisansi yatunganirijwe muri iki gihugu mu gihe yaba yaraguzwe n’ibindi bihugu, bitandukanye no kuba yaba iturutse i Moscow ku buryo butaziguye.

Iyi niyo mpamvu ibihugu biri kujya kuyigurayo, bishobora kuzamura ibiciro mu gihe biri kuyigurisha ibi bihugu byafatiye ibihano u Burusiya.

Byanatumye kandi u Buhinde bwongera lisansi itumizwa mu Burusiya ku rugero rwo hejuru, cyane ko iyi lisansi yo yagabanirijwe ibiciro.

Kuva muri Mata kugeza mu Ukwakira, inganda zo mu Buhinde zatumije utugunguru ibihumbi 793 ku munsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .