00:00:00 IGIHE NETWORK KN KINYARWANDA EN ENGLISH FR FRANCAIS

Ibihugu bigize G7 byemereye Ukraine inkunga ya miliyari 50$

Yanditswe na Innocent Dushimimana
Kuya 13 June 2024 saa 05:21
Yasuwe :

Umuryango w’ibihugu birindwi bikize ku Isi, G7, kuri uyu wa 13 Kamena 2024 wemereye Ukraine inkunga ya miliyari 50 z’amadolari ya Amerika yo kuyifasha guhangana n’ingaruka z’ibitero by’ingabo z’u Burusiya.

Iki cyemezo cyafatiwe mu nama y’uyu muryango yahuje abayobozi b’ibihugu na za guverinoma biwugize yateraniye mu Butaliyani.

Ibihugu byitabiriye iyo nama ni Leta Zunze Ubumwe za Amerika, u Bufaransa, u Bwongereza, u Budage, u Buyapani, u Butaliyani na Canada.

Aba bakuru b’ibihugu na za guverinoma bemeranyije ko iyi nkunga izava mu mitungo y’Abarusiya yafatiriwe bitewe n’iyi ntambara. Izagurishwa, amafaranga azavamo ahurizwe hamwe, ashyikirizwe Ukraine.

Iyi nkunga yemerewe Ukraine igenewe ahanini gusana ibikorwaremezo byangijwe n’intambara u Burusiya bwayishojeho kuva muri Gashyantare 2022.

Perezida wa Amerika, Joe Biden, yatangaje ko inkunga igenerwa Ukraine idakwiye guhagarara kuko gutsinda kw’iki gihugu kwatuma umutekano w’ibituranye na cyo uhungabanywa n’u Burusiya.

Biden yagize ati “Ntabwo tuzatererana Ukraine kuko tubikoze, yasenyuka kandi ntibyagarukira aho. Abaturanyi ba Ukraine na bo bazahungabana, u Burayi bwose bwazahungabana. Abanyagitugu bo ku Isi bari kurebera hafi ikizaba kuri Ukraine.”

Perezida Volodymyr Zelensky wa Ukraine yishimiye uyu mwanzuro, agaragaza ko Ukraine yifuza indege z’intambara no guhugura abasirikare bazazitwara kugira ngo izashobore guhangana n’ingabo z’u Burusiya.

Yagize ati “kuri twebwe, icy’ingenzi ni ukutwongerera indege z’intambara no kuduhugurira abazitwara. Ubumenyi buhagije mu gukoresha indege za gisirikare tubwiteze ku bihugu byo mu burengerazuba bifite imbaraga, byamaze kwiyubaka.”

Inkunga ya G7 ikurikiye iyo ibihugu bigize NATO bimaze imyaka ibiri biha Ukraine. Mu biyigize harimo amafaranga ndetse n’ibikoresho bya gisirikare. U Bufaransa bwo bwateguje ko buzohereza i Kyiv abasirikare bo gutoza aba Ukraine gukoresha intwaro ziremereye.

Ibihugu byose bigize G7 byahagarariwe muri iyi nama yabereye mu Butaliyani
Perezida wa Ukraine, Volodymyr Zelensky, yishimiye inkunga G7 yemereye igihugu cyabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .