Hatangajwe imiterere y’umuhango wo gushyingura igikomangoma Philip

Yanditswe na Muhonzire Sylvine
Kuya 16 Mata 2021 saa 03:57
Yasuwe :
0 0

Mu muhango wo gushyingura umugabo w’umwamikazi w’u Bwongereza, Elizabeth II, Prince Philip, uzaba kuwa Gatandatu tariki 17 Mata 2021, abana be bane bazaba bagenda iruhande rw’imva ye. Ni umuhango uzitabirwa n’abantu 30 gusa.

Mu gihe umurambo we uzaba uvanwa mu buruhukiro buri muri Private Chapel ujyanwa muri Chapel ya St George ahazakomereza imihango yo kumusezera, abana be barimo abahungu batatu n’umukobwa umwe, aribo Prince Charles, Andrew, Edward na Princess Anne ndetse n’abuzukuru be Prince William na Prince Harry bazaba bakurikiye imodoka irimo umurambo.

Imodoka izaba itwaye umurambo wa Prince Philip ni iyo mu bwoko bwa Land Rover ndetse yagize uruhare mu gutanga ishusho yayo ubwo yakorwaga.

BBC yatangaje ko urugendo rugana kuri chapel, ruzaba ruyobowe n’itsinda ry’abaririmbyi rya gisirikare ryitwa Grenadier Guards, mu gihe abagize umuryango w’ibwami bazitabira umuhango bazaba bari inyuma y’isanduku y’umurambo wa Prince Philip.

Ku murongo w’imbere hazaba hari imfura n’ubuheta bwa nyakwigendera aribo Prince Charles na Princess Anne, ku murongo ukurikira hajyeho Prince Edward na Prince Andrew.

Ku murongo wa Gatatu hazaba hariho abana ba Prince Charles uzaragwa ingoma nyuma y’umwamikazi Elizabeth II, aribo Prince William na Prince Harry, hagati yabo harimo mubyara wabo Peter Philips umwana wa Princess Anne.

Inyuma yabo hazaba hari Antony Armstrong Jones umugabo wa Princess Margaret, (murumuna w’umwamikazi Elizabeth umaze imyaka 19 yitabye Imana), ndetse n’umugabo wa Princess Anne, witwa Vice Admiral Sir Tim Laurence, bakurikirwe n’abandi bo mu muryango w’igikomangoma Philip umaze icyumweru atabarutse.

Nyuma y’urwo rugendo Umwamikazi Elizabeth azaza mu modoka yo mu bwoko bwa Limousine yitwa State Bentley aherekejwe n’umwe mu bagore b’abizerwa be uzwi nka ‘Lady in Waiting’, ubundi yinjire muri Chapel ‘wenyine’ mu muryango utandukanye n’undi abandi binjiriyemo.

Abazitabira umuhango wo gushyingura bose ntabwo bazambara imyenda ya gisirikare, ahubwo bazambara amakote ariho imidari, bambare udupfukamunwa, bahane intera nka bumwe mu buryo kwirinda Covid-19, umwamikazi we azaba yicaye wenyine.

Muri Chapel hazaririmba korali igizwe n’abantu bane kubera ingamba zo kwirinda icyorezo cya Covid-19, abitabiriye ntibemerewe kuririmba.

Ingoro y’ubwami bw’u Bwongereza, Buckingham Palace, yatangaje byagoye Umwamikazi guhitamo abantu 30 mu bantu 800 baba bagomba kwitabira umuhango wo gushyingura umwe mu bantu bakomeye ibwami.

Umwamikazi Elizabeth II aherutse gutangaza ko urupfu rw'Igikomangoma Philip rwamusigiye icyuho kinini
Iyi ni yo modoka izatwarwamo umurambo wa nyakwigendera
Abuzukuru bose b'igikomangoma Philip Eugenie na Beatrice ni bamwe mu bazitabira umuhango wo kumshyingura
Abagize umuryango wa hafi w'umwamikazi Elizabeth n'igikomangoma Philip

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .