Harvey Weinstein yatsinze umwe mu bamuregaga gufata ku ngufu

Yanditswe na Uwiduhaye Theos
Kuya 11 Ukwakira 2018 saa 06:53
Yasuwe :
0 0

Icyamamare mu mwuga wa sinema, Harvey Weinstein, umaze iminsi ashinjwa n’abagore benshi bakina filime kubafata ku ngufu mu myaka ishize; yatsinze kimwe mu birego yari akurikiranyweho.

Ikirego cy’umugore witwa Lucia Evans washinjaga Harvey Wenstein kumufata ku ngufu cyakuwe mu byo uyu mugabo akurikiranyweho, nyuma y’aho umucamanza yanzuye ko habayeho uburiganya mu batangabuhamya ndetse n’abunganiraga uyu mugore washinjaga Weinstein.

Mu ibaruwa umucamanza wo muri New York yandikiye umunyamategeko wa Weinstein yagaragaje ko umukiliya we icyaha aregwa nta shingiro gifite.

Iyi ni intsinzi ikomeye ya Weinstein mu byaha byo gufata ku ngufu bikomeye bitatu yashinjwaga.

Harvey Weinstein usanzwe ari inkingi ya mwamba mu ruganda rwa sinema y’i Hollywood muri Leta Zunze Ubumwe za Amerika, mu mpera za 2017 nibwo yatangiye gushinjwa ibyaha byo gukoresha abagore imibonano mpuzabitsina ku gahato no kubareba ubwambure abizeza ibitangaza.

Icyo gihe abagore barenga magana abiri bagaragaje ko bagiye bakorerwa iri hohoterwa bakaryumaho batinya uyu mugabo wari uri muri ba ndakorwaho muri sinema, wicaga agakiza.

Umugore witwa Rose McGowan wamenyekanye muri filimi nka Charmed, Fifty Dead Men Walking n’izindi, ku ikubitiro yazamuye ijwi yikirizwa na benshi biteza ikibazo gikomeye kuri uyu mugabo, wavugaga ko ntawe baryamanye batabyumvikanyeho.

Amagana y’abagore yatangiye kuvugira ku mbuga nkoranyambaga no mu binyamakuru, ko uyu mugabo akwiriye gukurikiranwa. Polisi itangira iperereza ubwo.

Uyu mugabo w’imyaka 65 byamuteje igihombo gikomeye yirukanwa mu kigo The Weinstein Company yagize uruhare mu gushinga anamburwa ubunyamuryango muri Academy of Motion Picture Arts and Sciences itegura ibihembo bya Oscars.

Umugore we Georgina Chapman yari yatangaje ko bagiye gutandukana ariko nyuma aza kwisubiraho ndetse na Hillary Clinton yateye inkunga mu kwiyamamariza umwanya wa Perezida wa Amerika amusubiza igitaraganya amafaranga yamuhaye.

Weinstein aracyafite ibindi byaha akurikiranyweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza