Umunyamerika w’umubwirizabutumwa kuri Televiziyo, Pat Robertson aravuga ko azagana iy’amategeko, ikipe y’abanyakanada ikora amafilimi niramuka isohoye filimi irimo gutegura, yerekana uko Robertson yagiye yifashisha guha ubufasha ababaye muri Afurika, nyamara ari uburyo bwo gukomeza gufasha no gushyigikira ibikorwa bye byo gucukura Diyama muri Repubulika iharanira Demokarasi ya Congo.

Umuryango uharanira uburenganzira bwa muntu, ku wa gatanu w’icyumweru gishize, watangaje ko Pasiteri Robertson azarega ikipe igizwe na Lara Zizic na David Turner barimo gukora filimi yiswe “Mission Congo”, ikaba yaragombaga kwerekanirwa mu iserukiramuco ry’amafilimi ryabereye i Toronto muri Canada.

Iyo filimi “Mission Congo,” ikinyamakuru The Guardian, kivuga ko yerekana ukuntu Robertson yagiye asaba imfashanyo y’amafaranga yo kohereza mu nsengero ze zo mu mahanga, nyamara agakoreshwa mu kugura ibikoresho by’ubucukuzi n’izindi serivisi nkenerwa zikorerwa ku birombe bye bya Diyama, biherereye muri Repubulika iharanira Demokarasi ya Congo.

Robertson yagiye anakoresha amafoto y’abaganga ndetse n’amahema yatanzwe n’abaganga batagira umupaka (Médecins sans Frontières:MSF), agamije guteza imbere icyo yise igikorwa cy’umugisha “Operation Blessing”; aho yavugaga ko itsinda rye ryatanze amahema n’abaganga ndetse n’amafaranga yatanzwe n’urusengero, byose ngo byo gufasha igihugu cyashegeshwe n’intambara.

Iyi filimi ivuga ko kugeza ubu Pasiteri Robertson agikoresha Operation Blessing, mu gukomeza kwikungazaho amamiliyoni y’amadolari buri mwaka amufasha we n’umuryango we.

Iyi filimi harimo ubuhamywa bw’abahoze bakorera Operation Blessing, bavuga ko ibikorwa byiswe iby’ubutabazi by’uwo mupasiteri, ari ibyo koherereza ibikoresho by’ubucukuzi abamukorera mu kirombe cy’ahitwa Kamonia, muri Congo.

Uwigeze gushingwa ibikorwa bya Operation Blessing mu mwaka wa 1994 mu mujyi wa Goma, Jessie Potts, yabwiye abakoze iyo filimi ko mu gikorwa havuzwe ko hatanzwe imiti ku mpunzi z’abanyarwanda zari muri Zaire, nyamara ngo ntiyari ijyanye n’indwara yaharangwaga. Ubusanzwe imiti yari ikenewe n’iyo kuvura icyorezo cya Kolera cyari kibasiye impunzi.

Jessie Potts ati “twabonye imiti ya Tylenol myinshi cyane. Sinigeze menya Tylenol mu buzima. Twabonye imiti ya Tylenol ngo duhe Zaire yose. Mana yanjye, ni ubwa mbere nabonye imiti myinshi mu buzima.”

Nyuma gato mu 1994, ibyo gutanga imiti byaje guhagarara n’indege zayizanaga zirahagara ntizongera kuyitanga, ahubwo zikajya zikorera ibikoresho by’ubucukuzi, nk’uko Robert Hinkle wahoze atwara indege za Pasiteri Robertson abyemeza.