Coronavirus: RwandAir yagabanyije imishahara y’abakozi, abayobozi bakuru bayo ntibazahembwa muri Mata

Yanditswe na Rabbi Malo Umucunguzi
Kuya 26 Mata 2020 saa 05:48
Yasuwe :
0 0

Ikigo cy’u Rwanda gishinzwe Ubwikorezi bw’Indege, RwandAir, cyatangaje ko mu rwego rwo kurengera ahazaza h’iki kigo no kwirinda guhagarika abakozi, cyafashe ingamba zirimo kugabanya imishahara mu rwego rwo guhangana n’ingaruka zatewe n’icyorezo cya Coronavirus.

Ni imyanzuro ishingiye ku cyemezo Guverinoma y’u Rwanda iheruka gufata cyo gufunga imipaka n’ingendo mpuzamahanga hagamijwe gukumira ikwirakwira ry’icyorezo cya Coronavirus gikomeje kwibasira Isi.

Ni icyemezo cyafunze isoko y’inyungu ya RwandAir, ku buryo byari ngombwa ko hafatwa ingamba zatuma gikomeza kubaho, ibintu byazongera kumera neza ingendo zacyo zigasubukurwa.

Mu itangazo yashyize ahagaragara kuri iki Cyumweru, RwandAir yavuze ko "yafashe ingamba zitandukanye z’igihe gito mu kugabanya amafaranga ikoresha, harimo no kugabanya imishahara y’abakozi."

Ubutumwa IGIHE yabonye ko bwohererejwe abakozi bose, bugaragaza ko abayobozi bakuru ba RwandAir barimo Umuyobozi Mukuru n’umwungirije, n’abandi bayobozi b’amashami (directors), bazigomwa umushahara wabo w’ukwezi kwa Mata.

Harimo kandi ko umushahara buri mukozi atahana wagabanyijwe, uhembwa make ukazavaho 8% naho abahembwa menshi ugabanywaho 65%. Ni ibyemezo RwandAir ivuga ko yafashe nyuma yo gusesengura ingaruka zimaze kugaragara kuri iki kigo, n’urwego rw’indege rwahungabanye cyane muri ibi bihe.

Rikomeza riti "Ubuyobozi bwa RwandAir bwifatanyije n’abakozi bacu muri ibi bihe bigoye kandi buzakomeza gukora ibishoboka byose mu guhangana n’ingaruka z’iki cyorezo no guharanira iterambere ry’ikigo umunsi ibikorwa byasubukuwe."

Mu byemezo byafashwe kandi, abayobozi bari mu myanya itandukanye baratangira guhabwa imishahara igenewe imyanya iri munsi y’iyo bariho.

Harimo kandi ko igihe cy’ihagarikwa ry’amasezerano y’abapilote cyongerewe, ko amasezerabo atari ngombwa yabaye ahagaritswe kimwe n’andi mafaranga yatangwaga ku ruhande nk’agenewe itumanaho, uretse ku bakozi bamwe.

Muri ubwo buryo kandi, abakozi basabwe kujya mu kiruhuko bemererwaga cy’umwaka, muri iki gihe cy’ihagarikwa ry’imirimo.

Mbere y’uko icyorezo cya Coronavirus gituma ingendo zihagarikwa, indege za RwandAir zakoraga ingendo mu byerekezo 29 byo muri Afurika y’Iburasirazuba, iyo Hagati, Iburengerazuba, Amajyepfo, u Burasirazuba bwo hagati, u Burayi na Aziya.

Nubwo muri ibi bihe bya Coronavirus ingendo zitwara abagenzi zahagaritswe, hongerewe imbaraga mu gutwara imizigo, kuko nubwo abantu benshi batava mu ngo, ibyo bakenera byo ntabwo byigeze bihagarara.

Perezida Kagame yijeje ubufasha mu kuzahura RwandAir

Mu kiganiro aheruka kugirana n’abashoramari, Perezida Paul Kagame yavuze ko nyuma ya Coronavirus hari inzego zizaba zikeneye kongerwamo ishoramari, kugira ngo ibikorwa byazo bizahuke.

Yavuze ko ikigo nka RwandAir kikiri gito, bizasaba kongeramo ubushobozi nk’uko bizaba bikenewe ku bindi bigo by’ubucuruzi, kubera ko ibikorwa byahungabanye.

Ati "RwandAir ni urwego rumwe tuzagerageza kimwe n’ibindi bikorwa bizakenera kongererwa ubushobozi kugira ngo bikomeze gukora, hirengagijwe ibihombo bizaba byarabayeho muri iki gihe tutazi n’igihe kizarangirira, kuko nta wavuga ngo kuri iyi tariki Coronavirus izaba yarangiye twasubiye mu buzima busanzwe."

Yavuze ko nubwo ubukungu bw’u Rwanda bwahagaze muri ibi bihe, hari icyizere ko umunsi icyorezo cya Coronavirus cyavuye mu nzira ibintu bizegenda neza.

Ihuriro mpuzamahanga ry’ibigo by’indege, IATA, mu kwezi gushize ryavuze ko ibi bigo bishobora guhura n’ibihombo bigera muri miliyari $252, mu gihe mbere hatekerezwaga ko igihombo kizaba miliyari $113.

Magingo aya South African Airways iri mu bihe bya nyuma kuko leta ya Afurika y’Epfo yanze kongeramo ishoramari kubera ibihombo bimaze igihe, ndetse Air Mauritius yashyizwe mu rwego rwo gufashwa ngo idasenyuka, kimwe na Virgin Australia.

Ni ibibazo byageze no ku bigo bikomeye, ku buryo Air France - KLM Group iheruka kwemererwa na za Guverinoma ishoramari rigera kuri miliyari €9 kugira ngo ibyo bigo bibashe gukomeza kubaho muri ibi bihe bya Coronavorus.

Harimo ko u Bufaransa buzaha Air France miliyari €3 mu nguzanyo n’izindi miliyari miliyari €4 zizishingirwa na leta. Ni mu gihe Guverinoma y’u Buholandi yemeye gushyira muri KLM inkunga iri hagati ya miliyari €2 na miliyari €4.

Ikigo cy’Igihugu gikora Ubwikorezi bw’Indege, RwandAir, cyagabanyije imishahara y’abakozi, abayobozi bakuru bacyo ntibazahembwa muri Mata kubera Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .