Canada yasobanuye ko mu gihe Trump yashyira mu bikorwa uyu muhigo, bimwe mu bicuruzwa biva muri Amerika birimo imitobe n’ibikoresho bikoze mu byuma bizazamurirwa imisoro.

Trump yavuze ko azazamura iyi misoro mu gihe Canada itashyiraho ingamba zihamye zo gukumira abimukira badafite ibyangombwa binjira muri Amerika baturutseyo.

Ku wa 15 Mutarama 2025, abayobozi b’intara zo muri Canada barahuriye kugira ngo bungurane ibitekerezo ku buryo bwo kurwanya umugambi wa Trump. Abenshi bashyigikiye igitekerezo cyo kwihimura, bamwe muri bo bagaragaza ko harimo imbogamizi.

Guverineri w’Intara ya Ontario, Doug Ford, yasabye ko hajyaho ingamba zikomeye, mu gihe mugenzi we wa Alberta, Danielle Smith, yanze ko zijyaho kuko zakwangiza ubukungu bw’intara abereye umuyobozi na Canada muri rusange.

Ford yagize ati "Ntabwo wakwemera ko umuntu agukubitisha inyundo mu mutwe, ngo wowe ntumwishyure inshuro zikubye kabiri."

Smith we yagize ati “Alberta ntiri bwemere gushyira imisoro ku bicuruza by’ingufu z’bikomoka kuri peteroli n’ibindi bicuruzwa, cyangwa ngo ishyigikire ihagarikwa ry’ibyo bicuruzwa."

Canada ikomeje kuganira na Amerika kugira ngo yirinde kuzamura iyi misoro, ishimangira akamaro k’ubucuruzi hagati y’ibihugu byombi burimo ubworoherane.

Mu rwego rwo gukumira abimukira binjira muri Amerika, Canada isabwa gushora miliyoni 900 z’Amadorari mu kugura ibikoresho birimo indege zitagira abapilote, kajugujugu n’izindi ngamba zo gukaza umutekano ku mipaka.

Abayobozi b'intara nyinshi muri Canada bemeranyije ko igihugu cyabo cyazihimura kuri Trump mu gihe yazamura iyi misoro