Bwa mbere leta ya Cameroun yakoresheje indege y’intambara irwanya abarwanyi b’umutwe wa Kiyisilamu wa Boko-Haram ukomoka muri Nigeria, wari wagabye igitero ku birindiro by’ingabo za Cameroun biherereye Assighasia.

Inkuru ya AFP igaragaza iyi ndege yari yoherejwe na Perezida wa Cameroun Paul Mbia, ngo ibashe gusubiza inyuma aba barwanyi ba Boko-Haram bari basatiriye cyane ingabo z’igihugu cye, mu mpera z’iki cyumweru tariki ya 28 Ukuboza 2014.

Itangazo ryatanzwe na Minisitiri Ushinzwe Itumanaho muri Cameroun, Issa Tchiroma Bakary, ryagiraga riti « Kuba indege yacu yinjiye mu bikorwa by’imirwano, bigaragaza ko Cameroun ishaka kugira icyo ikora ngo ihangane n’ibitero by’umutwe wa Boko-Haram bikomeje kwiyongera.»

Muri iri tangazo, Cameroun ivuga ko yabashije kwica benshi mu barwanyi ba Boko-Haram muri iki gitero ariko imibare y’abaguye muri iyi mirwano, ngo ntirashyirwa ahagaragara.

Ibikorwa bya Boko-Haram muri aka gace, bimaze kugwamo benshi mu nzirakarengane z’abasivile ndetse batangiye no kugaba ibitero byinshi ku ngabo za Cameroun.

Mu Kwakira, abavisile icumi n’abasirikare umunani baguye mu gitero cya Boko-Haram.

Imibare itangwa n’ingabo za Cameroun, igaragaza ko bamaze kwivugana abarwanyi ba Boko-Haram bagera mu gihumbi ariko bemera ko batakaza abasirikare bagera kuri 30.