Bwa mbere mu mateka, umugore yahawe inshingano zikomeye muri Kiliziya Gatolika

Yanditswe na Ndayikunda Josué
Kuya 16 Mutarama 2020 saa 01:41
Yasuwe :
0 0

Papa Francis yagize Francesca Di Giovanni, ushinzwe guhuza ibikorwa bya Leta ya Vatican, n’andi matsinda n’imiryango irimo uw’abibumbye. Ibi bikaba byatumye aba umugore wa mbere uhawe inshingano zikomeye mu mateka ya Kiliziya Gatorika no mu bunyamabanga bwa Vatican.

Umunyamategeko Di Giovanni w’imyaka 66, azakora mu rwego rushinzwe ububanyi n’amahanga bwa Vatican, rukaba rushinzwe ibikorwa bya politiki na dipolomasi.

Papa Francis yakunze gushyigikira ko abagore bagira imyanya ikomeye mu butegetsi bwa Vatican.

Ni mu gihe kandi afite umugambi wo koroshya amategeko abuza abihayimana gushyingirwa no kwemerera abashatse abagore kuba nabo baba abapadiri. Bamwe mu bamaze igihe kinini mu idini Gatolika bagenda bibaza aho Papa Francis arimo aganisha iri dini bitewe n’impinduka za hato na hato agenda azana.

Uretse kuba yatangajwe no kuba yatorewe inshingano zikomeye kandi ari umugore, Di Giovanni yavuze ko no kuba Papa Francis yamugiriye icyizere na byo ari igitangaza.

Ati “Nyirubutungane yafashe icyemezo kidasanzwe ndetse kirenze ubwenge bwanjye, ibi bigaragaza ko hari ubushake bwo guha agaciro abagore. Gusa izi nshingano zishamikiye ahanini ku kuba nyine ari akazi kuruta kubibona mu ishusho y’uko ndi umugore.”

Yakomeje avuga ko afite icyizere cy’uko kuba ari umugore ari byiza bigendanye n’inshingano yahawe, gusa ibyo ngo n’ubundi n’impano ahuriyeho na bagenzi be b’abagabo.

Mu ijambo yagejeje ku mbaga y’abakirisitu ku bunani, Papa Francis yagarutse ku karengane abagore bahura nako, ashimangira ko bakwiriye nabo guhabwa umwanya mu myanya ifata ibyemezo.

Yagize ati “Buri ntambwe ishyira imbere abagore, ni intambwe ishyira imbere ubumuntu muri rusange.”

Di Giovanni yavukiye mu mujyi wa Palermo uherereye mu Butaliyani, akaba yarakoze mu buyobozi bwa Vatican imyaka 27. Afite impamyabumenyi mu bijyanye n’amategeko, akaba afite ubunararibonye mu by’ubukerarugendo, iby’abimukira n’impunzi, uburenganzira bw’abagore n’umutungo mu by’ubwenge.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .