Burundi: Agathon Rwasa yatangije ibikorwa byo gushinga ishyaka rishya

Yanditswe na David Eugène Marshall
Kuya 12 Nzeri 2018 saa 10:12
Yasuwe :
0 0

Rwasa Agathon wahoze ari umukuru w’Ishyaka FNL- Parpehutu mu gihugu cy’u Burundi, kuri uyu wa Gatatu tariki ya 12 Kanama 2018 yatangije ibikorwa byo gushinga ishyaka rishya FNL Amizero y’Abarundi.

Iri shyaka bagomba gushinga ngo ntiryitiranwa n’irisanzwe rya ’FNL’ isanzwe nubwo bihuje impine, kuko irishya ari Ishyaka riharanira ubwigenge bw’igihugu ’’Front National de Liberté-Amizero y’abarundi’’ mu gihe irisanzwe ari ’’Force Nationale de Libération’’.

Kuri uyu wa Gatatu nibwo Rwasa yagiranye inama n’abo bafatanije mu gushinga iryo shyaka bageraga kuri 500 baturukaga mu ntara zose z’u Burundi.

Yabwiye itangazamakuru ati "Mu gushinga ishyaka, icya mbere ni uko dushaka ko abantu bakina politike badakebaguzwa, ikindi ni uko dushaka ko mu matora ataha dushobora kujyamo kugira ngo ntihabe ukwiyamamaza kw’ishyaka rimwe. Mu Burundi habarwa amashyaka mirongo ariko ugasanga havuga rimwe gusa.”

Rwasa yanijeje ko kuba ashinze ishyaka bitazatuma atandukana n’abo bari basanzwe barikumwe mu Ihuriro Amizero y’Abarundi.

Yavuze ko ikizakurikiraho ari ukujyana icyegeranyo cy’ibyavuye muri iyo nama muri Minisiteri y’Ubutegetsi bw’igihugu kugira basabe kwemererwa gukora ku mugaragaro.

Uyu mugabo yanavuze ko kuba agiye gushinga ishyaka, ntaho bihuriye n’uko yaba yarabyumvikanyeho na CNDD-FDD nk’ishyaka riri ku butegetsi.

Yavuze ko inama yo kuri uyu wa Gatatu yari igamije kuzuza ibisabwa n’amategeko, agena ko mbere gushinga ishyaka, mugomba kugaragaza inyandiko y’inama ishyiraho iryo shyaka.

Agathon Rwasa utavuga rumwe n’ubutegetsi, asanzwe ari na Visi Perezida w’Inteko Ishinga Amategeko guhera mu 2015.

Agathon Rwasa aganira n'itangazamakuru kuri uyu wa Gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza