00:00:00 IGIHE NETWORK KN KINYARWANDA EN ENGLISH FR FRANCAIS

Bizagenda gute ubwo Umwamikazi Elizabeth II azatanga?

Yanditswe na Mugisha Christian
Kuya 20 June 2022 saa 10:55
Yasuwe :

Elizabeth Alexandra Mary Windsor, Umwamikazi w’u Bwongereza, yavukiye mu gace ka Mayfair mu Mujyi wa Londres, ku wa 21 Mata mu 1926, amaze imyaka irenga 70 ku buyobozi.

Ku myaka 96, uburwayi bwa hato na hato, kubura mu bikorwa bihuza abantu benshi n’ibindi bimenyetso bitandukanye bimaze iminsi bimugaragaho, byatumye hibazwa uko byagenda mu gice yaba atanze, na cyane ko myaka 70 amaze ku butegetsi, benshi mu bariho uyu munsi batigeze babona uko bigenda iyo Umwami cyangwa Umwamikazi w’u Bwongereza atanze.

Elizabeth II yabaye Umwamikazi mu 1952, akaba ari we umaze igihe kirekire ku ngoma mu mateka y’ubu bwami. Ni umwe mu bamikazi bakunzwe cyane ku Isi bitewe ahanini n’uburyo yakunze kwigaragaza mu bikorwa bifasha ikiremwamuntu ndetse n’uruhare yagize mu gukemura ibibazo bikomereye Isi.

Uyu Mwamikazi yagize uruhare mu gutangiza imiryango itegamiye kuri leta irenga 600, yafunguwe mu bihugu bitandukanye by’Umuryango uhuza ibihugu bikoresha ururimi rw’Icyongereza, Commonwealth.

Elizabeth II afatwa nk’Umuyobozi w’uyu Muryango, nubwo nta ruhare agira mu byemezo bikomeye bifatwa nawo. Mu bihugu 54 biwugize, 15 bifite uburyo bw’imiyoborere bimugira umuyobozi wabyo, aho mu gihe amaze ku butegetsi, abantu bagera 170 bamaze guhabwa inshingano zo kuba ba minisitiri w’intebe muri ibyo bihugu. Mu Bwongereza imbere, Elizabeth II amaze kubona ba Minisitiri w’Intebe 14, mu gihe ba Papa batandatu bahawe inshingano ku bwami bwe.

Ubu buhangange bwe, kongeraho igihe amaze ari Umwamikazi, bituma benshi bibazo uko bizagenda mu gihe azaba atanze, ari nabyo tugiye kugarukaho muri iyi nkuru.

Uko bizagenda ubwo Elizabeth II azaba atanze

Kuri uwo munsi, Umunyamabanga we wihariye, kuri ubu ni Edward Young, azihutira gutambutsa ubutumwa kuri Minisitiri w’Intebe uzaba uriho icyo gihe, magingo aya hariho Boris Johnson. Ubutumwa buzatangwa icyo gihe buzaba bwitwa ‘London Bridge Down,’ bishatse kuvuga ngo ‘Ikiraro cy’i Londres kiri hasi,’ nk’uko byafashweho icyemezo mu 2017.

Iri zina ry’ubutumwa rikomoka ku izina ry’umwihariko rihabwa abami n’abamikazi b’u Bwongereza. Elizabeth II yahawe London Bridge mu gihe nka se umubyara, George VI, yari yarahawe Hyde Park Corner.

Aya mazina adasanzwe akoreshwa n’abagize Umuryango w’Ubwami n’abandi bari hafi yabo nk’abo mu nzego z’umutekano. Akoreshwa by’umwihariko mu gihe Umwami cyangwa Umwamikazi yatanze ariko inkuru ikiri imbere mu bagize Umuryango w’Ubwami, itarajya mu itangazamakuru hanze.

Mu minota itarenze 15 gusa, ubu butumwa buzaba bwamaze gusakara mu zindi Guverinoma 15 ziri hanze y’u Bwongereza uyu Mwamikazi abereye Umuyobozi, ndetse bwihutire kugezwa mu bihugu byose biri mu Muryango wa Commonwealth.

Ku marembo y’Ingoro y’Ubwami i Buckingham, hazashyirwa ikirango kigaragaza iyo nkuru y’incamugongo. Abanyamakuru b’Ikigo cy’Itangazamakuru cy’u Bwongereza, BBC, bazahita bambara imyambaro y’umukara bitegure gutangaza iyo nkuru, ndetse n’ibara ry’umutuku risanzwe rikoreshwa na BBC rizahindurwa umukara. Birumvikana ko irindi tangazamakuru hirya no hino ku Isi rizaba rirekereje, ubwo natwe niho tuzahera tubona ayo makuru.

Uwo munsi ibikorwa byose n’imirimo bikorerwa muri icyo gihugu bizafunga mu rwego rwo guha icyubahiro Umwamikazi wabayoboye igihe kinini.

Nyuma y’uko inkuru ibaye kimomo ku rwego rw’Isi, imfura ye, Igikomangoma Charles, ari nawe uzamusimbura ku butegetsi, azahita atangazwa nk’Umwami mushya.

Mbere y’ishyingurwa rya Elizabeth II, Igikomangoma Charles kizatangaza Ijambo rya mbere nk’Umwami w’u Bwongereza rizatangirwa ahitwa ‘Hyde Park’ mu Mujyi wa Londres, ahazakorerwa ibirori byo kumwimika. Muri aka gace, hashyinguye Umwami George VI ubyara Elizabeth II. Uyu Mwamikazi nawe yamaze kwemeza ko yifuza kuzashyingurwa muri aka gace.

Umwami Charles nahitamo gukomeza gukoresha iryo zina, azahita ategura ingendo zo kuzenguruka igihugu cye abonana n’abayobozi batandukanye. Mu bitangazamakuru byo mu Bwongereza, cyane cyane nka BBC, izanyuzaho inkuru na filime zigaruka ku buzima bw’uyu Mwamikazi.

Nyuma y’iminsi ine Elizabeth II atanze, mu karasisi kadasanzwe k’Ingabo z’u Bwongereza, umubiri w’Umwamikazi uzavanwa mu Ngoro y’Ubwami yerekezwe Westminster Hall, ahakorerwa imihango y’ibwami nko gusezera ku bami n’abamikazi ndetse n’ibindi. Uyu mubiri uzahamara iminsi ine, abantu batandukanye bemerewe kujya kuwusezeraho.

Ishyingurwa rye rishobora kuzakorwa nyuma y’iminsi iri hagati ya 10 na 12 atanze. Uwo munsi uzagirwa uw’ikiruhuko mu gihugu cyose cy’u Bwongereza.

Saa Tanu z’amanywa z’umunsi azashyingurwaho, inzogera izavuga maze hafatwe igihe cyo gutuza mu gihugu hose. Umubiri we uzasohorwa, unyuze hagati y’abashyitsi ibihumbi bibiri bazitabira uwo muhango, aho bazubika imitwe yabo mu gihe umugogo w’uyu Mwamikazi uzaba uri gutambutswa.

Uyu mugogo uzaremera mu modoka yabugenewe utambagizwe uganishwa muri ‘Windsor Castle,’ Ingoro izwi cyane kandi imaze igihe kinini, ubundi utambagizwe ugana kuri Shaperi ya St George ihereye muri iyi Ngoro, nyuma nibwo uzashyingurwa.

Nyuma y’igihe atanze, hazaba umuhango wo kwambika ikamba umwami Charles hongere hatangwe undi munsi w’ikiruhuko mu Bwongereza.

Hazabaho impinduka nyinshi, aho ifoto iri mu mafaranga akoreshwa muri icyo gihugu izahindurwa, ari nako bizagenda kuri cashe zikoreshwa mu nzego z’ubuyobozi muri icyo gihugu.

Nyuma yitegurwa ry’umuhango wo gushyingura no kwimika umwami mushya u Bwongereza buzaba bumaze gukoresha akayabo k’amapawundi ari nako hategurwa impinduka nyinshi. Pasiporo, imyambaro y’inzego z’umutekano n’ibindi bitandukanye, byose bizakorwaho impinduka.

Indirimbo yubahiriza Igihugu izahindurirwa izina ireke kwitwa ‘God save the Queen’ ahubwo yitwe ‘God save the King’ bisobanura ngo ‘Mana tabara Umwami.’

Ibihugu bigize Commonwealth ndetse n’ibindi birebererwa n’Ubwami bw’u Bwongereza bizakira Umwami mushya.

Umwamikazi Elizabeth II afite imyaka 96
Umwamikazi w'u Bwongereza, Elizabeth II azasimburwa n'Igikomangoma Charles

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .