Amazon yasabye abakozi bayo gusiba TikTok muri telefone ku mpamvu z’umutekano

Yanditswe na Twarabanye Venuste
Kuya 11 Nyakanga 2020 saa 12:23
Yasuwe :
0 0

Ikigo gikomeye mu bucuruzi bukorerwa ku Ikoranabuhanga cyo muri Leta Zunze Ubumwe za Amerika, Amazon, cyasabye abakozi bacyo gukura application ya TikTok muri telefoni zabo bitarenze tariki 10 Nyakanga 2020 kubera impamvu z’umutekano zitatangajwe.

CNBC yatangaje ko yabonye ubutumwa [E-mail] bwohererejwe abakozi ba Amazon bubasaba gusiba TikTok muri telefoni zabo kubera ibyago ku mutekano wabo bashobora guhura nabyo.

Abakozi basabwe gukura iyo application muri telefoni bakoresha binjira mu email y’iyo kampani bitarenze ku wa Gatanu.

Ubutumwa bugira buti “ Niba ufite TikTok mu gikoresho cyawe cy’ikoranabuhanga, ugomba kuyikuramo bitarenze ku wa 10 Nyakanga 2020 kugira ngo ukomeze gukoresha email ya Amazon muri telefoni ngendanwa yawe.”

Gusa ariko Amazon yavuze ko gukoresha TikTok muri mudasobwa ngendanwa byemewe.

Ku mugoroba wo kuri uyu wa Gatanu, Umuvugizi wa Amazon, yavuze ko ubwo butumwa bwahawe abakozi habayemo amakosa mu kubwohereza bityo nta mpinduka zabayeho muri gahunda z’imikoreshereze ya TikTok.

Icyo cyemezo cyafashwe nyuma yuko iyo application y’ikigo cy’Abashinwa, ByteDance gikorera mu mujyi wa Beijing, itangiye gukemangwaho ibibazo by’umutekano na Leta Zunze Ubumwe za Amerika.

Abanyapolitiki bo muri Amerika bafite impungenge z’uko Guverinoma y’u Bushinwa ishobora kugera ku makuru ya Amerika binyuze mu bakoresha TikTok.

Umunyamabanga wa Leta ushinzwe ububanyi n’amahanga muri Amerika, Mike Pompeo aherutse gutangaza ko bari mu byago byo gushyira amabanga yabo mu biganza by’Abashinwa kubera iyo Application.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .