Abashyigikiye Trump bateguye imyigaragambyo ikomeye ku munsi w’irahira rya Biden

Yanditswe na Theogene Uwiragiye
Kuya 17 Mutarama 2021 saa 09:33
Yasuwe :
0 0

Habura iminsi itatu ngo Joe Biden arahirire kuyobora Leta Zunze Ubumwe za Amerika, Ikigo Gishinzwe Iperereza muri icyo gihugu (FBI), cyaburiye abashinzwe umutekano ko muri leta zigera kuri 50, hari abateguye imyigaragambyo ikomeye kuri uwo munsi.

Ku wa Gatatu tariki ya 20 Mutarama 2021 biteganyijwe ko Perezida watowe Joe Biden azarahirira kuyobora Leta Zunze Ubumwe za Amerika.

Ubu umutekano wakajijwe bikomeye aho abasirikare benshi cyane boherejwe i Washington DC ahubatse ibiro bya Perezida wa Amerika.

BBC ivuga ko inzego z’umutekano zatangaje ko nta muntu uzaba yemerewe kunyura hafi y’ingoro ya Perezida kugeza igikorwa cyo kurahira kirangiye. Abaturage benshi bazakurikira uyu muhango hakoreshejwe ikoranabuhanga.

FBI batangaje ko abateguye iyi myigaragambyo bashobora no kuzakoresha intwaro za gisirikare.

Kugeza ubu zimwe muri leta zo muri Amerika nka Texas, California, Pennsylvania, Michigan, Virginia, Washington, Wisconsin n’izindi, zamaze gufunga imiryango y’Ingoro Nshinga Amategeko zazo, aho biteganyijwe ko zizongera gufungura nyuma y’irahira rya Joe Biden ugiye kuba Perezida wa 46 w’iki gihugu.

Ibi biri kuba hirindwa imyigaragambyo nk’iherutse kubera ku ngoro y’Inteko Ishinga Amategeko muri icyo gihugu tariki ya 6 Mutarama igahitana abantu batanu. Ubu hari gukorwa ibishoboka ngo ibikorwa nk’ibyo bitazasubira kuri uyu munsi ukomeye ku Banyamerika.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .