Ellen DeGeneres yifashe amashusho yereka abamukurikira uburyo imvura nyinshi imaze iminsi igwa yateje umwuzure mu gace ka Montecito.

Mu butumwa yashyize kuri Twitter, Ellen yagaragaje uburyo amazi menshi akomeje gusatira urugo rwe, avuga ko yiteguye kwimuka akava aha hantu.

Kuri uyu munsi ni na bwo Oprah Winfrey yagaragaye mu mashusho yashyizwe ku mbuga nkoranyambaga ari kumwe n’ikipe y’ubutabazi yamushyikirije imbwa ye yari yaburiwe irengero kubera ikibazo cy’imyuzure yibasiye agace atuyemo.

Ikigo gishinzwe Ubutabazi muri Montecito cyasabye abantu bose baba muri aka gace n’abatuye hafi yako kwimuka mu gihe cya vuba mu rwego rwo kwirinda ibyago bishobora kubageraho.

Nubwo bavuga ibi, imvura nyinshi ivanze n’umuyaga yaguye mu masaha 12 yasize igushije ibiti byinshi mu mihanda ku buryo kubona uko abantu bava muri aka gace bishobora kuba ingorabahizi.

Ibi biza si ubwa mbere bibaye muri Montecito dore ko biheruka mu myaka itanu ishize, aho byahitanye abantu 23, bisenya ingo zisaga 100.

Aka gace bivugwa ko gatuyemo ibyamamare bitandukanye, aba barimo Oprah Winfrey, Prince Harry n’umugore we Meghan, Ellen DeGeneres, Adam Levine, Gwyneth Paltrow, George Lucas n’abandi.

Amashusho y’uko byifashe muri Montecito muri Leta ya California

Abarimo Prince Harry, Oprah Winfrey na Ellen DeGeneres basabwe guhunga ibiza byibasiye Umujyi wa Montecito muri Leta ya California muri Amerika

Abashinzwe Ubutabazi basabye abatuye mu Mujyi wa Montecito kuwuvamo bwangu bigishoboka

Imihanda imwe n'imwe yo muri Montecito irafunze, ntikiri nyabagendwa

Mu 2018 nanone urugo rwa Oprah Winfrey rwibasiwe n'ibiza