Abaganga barenga 1700 bo mu Bushinwa bamaze kwandura Coronavirus

Yanditswe na Evariste Nsengimana
Kuya 15 Gashyantare 2020 saa 09:32
Yasuwe :
0 0

Komisiyo ishinzwe Ubuzima mu Bushinwa (NHC), yatangaje ko abaganga 1 716 ari bo bamaze kugaragaza ibimenyetso by’uko banduye virus ya Coronavirus, barimo batatu bamaze kwitaba Imana mu gihe abaturage basanzwe bo imibare ikomeje kwiyongera.

Iyi mibare NHC yatangaje kuri uyu wa Gatanu, igaragaza ko muri aba baganga bakekwaho kwandura Coronavirus, 87.5% bagiriye ingendo mu Ntara ya Hubei, ibarizwamo Umujyi wa Wuhan iyi ndwara yahereyemo.

Imibare mishya igaragaza ko abamaze kwandura Coronavirus mu Bushinwa, bakabakaba ibihumbi 70 mu gihe abamaze guhitanwa na yo bagera ku 1500 biganjemo abaguye mu Bushinwa.

Umwe mu baganga ukorera ku ivuriro riherereye mu Mujyi wa Wuhan iyi ndwara yabanje kugaragaramo ariko utarashatse ko ivuriro akoreraho ritangazwa yabwiye CNN ko yishyize mu kato nyuma yo gusanganwa ibimenyetso byayo ku wa 26 Mutarama.

Ati “Kugeza ubu ni ikibazo gikomeye, ivuriro ryacu rifite abantu barenga 100 bashyizwe mu kato mu rugo iwabo.”

Uyu muganga yavuze ko mu baganga bakorera kuri iryo vuriro barenga 500, abagera kuri 30 byamaze kwemezwa ko banduye Coronavirus naho abarenga 130 bakaba bayikekwaho. Yavuze ko kugeza ubu nta kibazo afite ariko asuzumwe ibipimo bigashimangira ko nta bimenyetso afite yasubira ku kazi.

Uretse ivuriro uyu muganga avuraho n’ahandi muri iki gihugu bakomeje kugaragaza ko iyi virus ikomeje kwadukira abaganga batari bake.

Umuganga wo ku bitaro bya Wuhan yanditse kuri Twitter ko bagenzi be hafi 150 byamaze kwemezwa ko bafite iki virus nawe yishyizemo.

Umwe mu baganga wari wishyize mu kato mu kwezi gushize byemejwe ko yajyanywe mu bitaro ku wa kabiri w’iki cyumweru.

Mu baganga bamaze kwandura iyi ndwara mu mujyi wa Wuhan barenga 1102, bangana na 64% by’abaganga bose bayanduye mu gihugu, bakangana kandi na 73% by’abayanduye muri uwo mujyi.

Abaganga mu Bushinwa bakomeje kwadukirwa n'icyorezo cya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .