Wibena Impact na Wibena Institute ni ibigo bibiri bitandukanye ariko nanone byuzuzanya bitewe n’imikorere yabyo.

Wibena Impact ni umuryango utari uwa Leta, udaharanira inyungu wibanda ku guhindura imibereho y’urubyiruko n’abagore cyane cyane ab’amikoro make ubafasha guhanga imirimo, kubona ubutabera n’uburenganzira bwabo, ndetse ukanakora ibijyanye no guhangana n’ingaruka z’imihindagurikire y’ikirere.

Wibena Institute ni ikigo gitanga amahugurwa y’uburyo bunyuranye na serivisi ku bigo aho kibaha ubumenyi bukenewe mu kazi bakora, bigatuma bwiyongera ku bwo bakuye mu ishuri.

Iki kigo cyigisha abantu indimi mpuzamahanga nk’Icyongereza n’Igifaransa kikabafasha kubona impamyabushobozi mpuzamahanga mu ndimi, kwigisha abantu gukoresha mudasobwa, imiyoborere no gutanga serivisi z’ubushakashatsi ku bigo bya Leta, ibyigenga n’imiryango itari iya Leta.

Ibi bigo biruzuzanya kuko nk’iyo Wibena Impact ibonye umuntu ukeneye nka serivisi zo kwiga kandi atabasha kuziyishyurira, babimufasha binyuze muri Wibena Institute.

Kuri ubu Wibena Institute imaze gutanga serivisi ku bantu barenga 1000 mu Rwanda no hanze gusa ngo irifuza kumenyekanisha ibikorwa byayo ikagera ku rwego rwa Afurika.

Imwe mu nzira bazifashisha mu kumenyekanisha ibikorwa by’ibi bigo byombi harimo gukoresha abantu bazwi cyane bakabafasha kumenyekanisha izina ryabo n’ibikorwa byabo ku ruhando mpuzamahanga.

Mu kugeza ibikorwa by’ibi bigo kure, kuri ubu umunyamakuru Agasaro Tracy yatangiye kubyamamariza byombi.

Wibena Impact na Wibena Institute bikorera mu Mujyi wa Kigali rwagati mu nyubako ya Centenary House, bakagira n’amashami muri Kenya ndetse bakaba bagiye no kugaba amashami muri Repubulika Iharanira Demokarasi ya Congo.

Umuyobozi Mukuru wa Wibena Institute na Wibena Impact, Thomas Plura, yabwiye IGIHE ko bahisemo Tracy ngo abamenyekanishe kubera ko babonye ko byabafasha kumenyekana ku mugabane wose wa Afurika.

Ati “Tracy ni umuntu uzwi n’abantu benshi, ni umuntu ukora ibyo yiyemeje gukora, iyo avuze ikintu ubwo ni uko aba acyemera, kandi natwe ni uko dukora [……] Tracy azatumenyekanisha mu bihugu byose bya Afurika, namara kutumenyekanisha muri Afurika tuzatangira gukorana n’ibigo ndetse n’abakozi babyo tubashe kugera ku ntego yacu yo guteza imbere abana, urubyiruko n’abagore tukabageza ku rwego rwo kwigira ku bijyanye n’ubumenyi, n’imibereho.”

Yavuze ko Tracy agiye kubafasha kumenyekana ku rwego rwa Afurika no ku Isi yose ahereye kuri Kigali. Azakoresha imbuga nkoranyambaga nka Instagram, Facebook na Twitter.

Agasaro Tracy yavuze ko yiteguye gukora inshingano yahawe na Wibena Institute na Wibena Impact.

Ati “Niteguye kubafasha kumenyekanisha izina ryabo n’ibikorwa byabo. Nzifashisha imbuga nkoranyambaga zanjye nka Instagram n’izindi ngaragaza uburyo bakora ibintu byiza haba kwigisha urubyiruko n’abagore. Iyo uvuze guteza imbere urubyiruko n’abagore ukabatinyura kuvugira mu ruhame, ni ibintu byiza bifasha abantu.”

Agasaro Tracy ufatanya itangazamakuru n’ubuhanzi afite abantu barenga ibihumbi 33 bamukurikira kuri Instagram nka rumwe mu mbuga z’ibanze azifashisha.

Umuyobozi Mukuru wa Wibena Institute na Wibena Impact, Thomas Plura na Aganda Wycliffe washinze ibi bigo bishimiye gukorana na Agasaro Tracy mu kwamamaza ibikorwa byabo

Umuyobozi Mukuru wa Wibena Institute na Wibena Impact, Thomas Plura yishimiye gukorana na Agasaro Tracy kuko ngo ibyo yiyemeje arabikora

Abakozi batandukanye ba Wibena Impact na Wibena Institute bakiranye yombi Agasaro Tracy ugiye kubamamariza ibikorwa

Aganda Wycliffe washinze Wibena Impact na Wibena Institute yishimiye gukorana na Agasaro Tracy mu kumenyekanisha ibikorwa

Aganda Wycliffe washinze Wibena Impact na Wibena Institute ibigo bifite intego yo kugeza serivisi zabyo mu bihugu byose bya Afurika

Agasaro Tracy (uwa kabiri iburyo) n'umukunzi we René Patrick (hagati) hamwe n'abayobozi ba Wibena Institute na Wibena Impact

Agasaro Tracy ni umwe mu byamamare bizafasha Wibena Institute na Wibena Impact kugera ku ruhando mpuzamahanga

Agasaro Tracy yatangiye kwifashisha imbuga nkoranyambaga ze mu kwamamaza ibikorwa bya Wibena Impact na Wibena Institute

Agasaro Tracy yishimiye gukorana n'ibigo biteza imbere urubyiruko n'abagore bikanafasha abafite amikoro make

Agasaro Tracy yari yateguriwe n'umutsima wo kumuha ikaze

Wibena Institute na Wibena Impact bigiye kwagurira ibikorwa mu bihugu byose bya Afurika

René Patrick yari yaherekeje umukunzi we Tracy mu birori byo gusinya amasezerano hagati ye na Wibena Impact na Wibena Institute

Amafoto: Muhizi Serge