Urukiko rwategetse ko abarimo Caleb Rwamuganza, Serubibi na Rwakunda bakomeza gufungwa

Yanditswe na Habimana James
Kuya 23 Kamena 2020 saa 04:52
Yasuwe :
0 0

Urukiko rw’Ibanze rwa Gasabo kuri uyu wa Kabiri rwategetse ko abarimo Caleb Rwamuganza wahoze ari Umunyamabanga Uhoraho muri Minisiteri y’Imari n’Igenamigambi, Minecofin na Christian Rwakunda wahoze ari Umunyamabanga Uhoraho muri Minisiteri y’Ibikorwa Remezo (Mininfra) bakomeza gufungwa by’agateganyo.

Abo hamwe na Serubibi Eric wahoze ari Umuyobozi w’Ikigo cya Leta gishinzwe imyubakire (RHA), Kabera Godfrey wari ushinzwe igenamigambi muri Minisiteri y’imari n’igenamigambi ndetse na Rusizana Aloys, bashinjwa guhombya Leta saga miliyari ebyiri.

Bakurikiranyweho ibyaha bitatu birimo gukoresha nabi umutungo wa Leta ufitiye rubanda akamaro, gutanga isoko rya Leta binyuranyije n’amategeko no kugira akagambane n’upiganira isoko rya Leta bituruka ku nzu Rusizana yagurishije Leta mu mwaka wa 2018, ikagurwa amafaranga menshi kandi nta piganwa ribayeho nkuko ubushinjacyaha bubivuga.

Urukiko rwategetse ko bakomeza gufungwa kubera ko bakekwaho ibyaha bikomeye, birimo ko bahamwe n’ibi byaha bashobora gufungwa byibuze imyaka ibiri.

Abaregwa bari basabye kurekurwa kubera ko badashobora gutoroka, ndetse bakaba bari bemeye gutanga ingwate.

Kuba abaregwa baravugaga ko batanze ingwate zirimo inzu zabo, urukiko rwavuze ko Rusizana Aloys, ari we wenyine igenagaciro ryagaragaje ko imitungo ye irengeje miliyari 3, abandi bose basanze imitungo batanze itarengeje miliyoni 100.

Ni mu gihe ubushinjacyaha bwari bwasabye ko uwarekurwa by’agateganyo ari uwagaragaza ingwate ifite agaciro nibura ka miliyari eshatu kuko bashinjwa kunyereza miliyari zisaga ebyiri.

Nubwo ingwate ya Rusizana ingana n’iyo ubushinjacyaha bwasabaga, urukiko rwanzuye ko ingwate zitahabwa agaciro kubera ko ibyaha bakurikiranweho bikomeye, ndetse bakaba bashobora gucika ubutabera.

Urukiko kandi rwanze ubusabe bwa Rwakunda na Rusizana, basabaga ko barekurwa kubera ko bavugaga ko barwaye, rwo ruvuga ko aho bafungiwe hari abaganga bashobora gukomeza kubavurirayo.

Uhereye ibumoso hari Rwakunda Christian, Serubibi Eric na Caleb Rwamuganza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .