Umwiryane urakomeje muri FDLR: Gen Secyugu yishwe

Yanditswe na Mukwaya Olivier
Kuya 24 Ukwakira 2020 saa 09:14
Yasuwe :
0 0

Gen Nsengiyunva Secyugu wari ushinzwe ibikorwa bya gisirikare muri FDLR yishwe bikaba bikekwa ko yazize amakimbirane amaze iminsi muri uwo mutwe w’iterabwobwa nyuma y’urupfu rwa Gen Mudacumura Sylvestre wawuyoboraga.

Bivugwa ko barimo kwicana no kwikiza abo bakeka ko baba bari inkoramutima za Mudacumura ndetse n’amacakubiri ashingiye ku moko n’uturere.

Amakuru avuga ko Nsengiyunva Secyugu yishwe arashwe n’uwari ashinzwe kumurinda ku bikaba bikekwa ko yaba ari amabwiriza yahawe n’umuyobozi mukuru w’inyeshyamba za FDLR Jenerali Ntawunguka Pacifique uzwi kw’izina rya Omega.

Bivugwa ko amacakubiri akomeje kuranga uyu mutwe ashingiye ku nkomoko aho bashaka kwikiza abakomoka hamwe na Gen Mudacumura n’abakomoka mu majyepfo y’u Rwanda.

Mu 2016 nibwo hamenyekanye amakuru ko umutwe w’iterabwoba FDLR wacitsemo ibice kugeza ubwo abo barwanyi biyemeje gushinga undi mutwe, CNRD (Conseil National pour le Renouveau et la Démocratie).

Amakuru yavugaga ko uyu mutwe washwanyuwe n’igitero wagabye kigahitana abantu batanu, bigateza ubwumvikane bucye hagati y’umuyobozi wabo Gen. Maj. Victor Byiringiro n’icyegera cye, Col Wilson Irategeka.

Byavugwaga kandi ko FDLR yakekaga ko Col Irategeka akorana n’abayirwanya barimo Umuryango Mpuzamahanga n’u Rwanda. Icyo gihe Mudacumura yagumye mu gice cya Byiringiro aricyo cyizwi nka FDLR-FOCA.

Secyugu amazina ye y’ukuri yitwa Nsengiyunva Venuste akaba azwi ku mazina ya Secyugu Gabral. Yavutse mu mwaka wa 1962, avukira mu yahoze ari segiteri ya Bugarura,Komini Muhura,Perefegitura ya Byumba ubu ni mu Karere ka Gatsibo. Yinjiye mu gisilikare cya EX FAR mu mwaka wa 1989. Mu 1990 nibwo Secyugu yinjiye mu ishuri rikuru rya Gisilikare ESM muri Promotion ya 30.

EX FAR ubwo yatsindwaga mu 1994, yahungiye muri Zaire afite ipeti rya Lieutenant. Mu 1999 Gen.Secyugu yinjiye mu ngabo za Laurent Desire Kabila aho yayoboraga Batayo ya 88,ahagana mu mwaka wa 2004 nibwo yinjiwe muri FDLR.

Biravugwa ko Secyugu yaba yazize akagambane n'amacakubiri amaze igihe muri FDLR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .