00:00:00 IGIHE NETWORK KN KINYARWANDA EN ENGLISH FR FRANCAIS

Umuyobozi Mukuru wa Volkswagen yeguye

Yanditswe na Bukuru JC
Kuya 23 July 2022 saa 03:15
Yasuwe :

Herbert Diess wari Umuyobozi Mukuru wa Volkswagen, yeguye kuri uwo mwanya mu buryo bwatunguranye, nyuma y’imyaka ine yari amaze mu nshingano.

Diess wageze muri Volkswagen mu 2015, yagize uruhare rufatika mu gufasha icyo kigo kongera kubaka izina ryacyo nyuma yo gusanga cyarabeshye amakuru ajyanye n’umwuka imodoka zayo zohereza mu kirere.

Uyu mugabo yashyize imbaraga zifatika mu kuzamura umusaruro wa Volkswagen, cyane cyane mu bijyanye no kongera imodoka zikoresha amashanyarazi. Mu mwaka ushize, uru ruganda rwaje ku mwanya wa gatatu ku rwego rw’Isi mu gucuruza imodoka nyinshi zikoresha amashanyarazi, ndetse ruza ku mwanya wa mbere mu Burayi, aho rwihariye 25% by’isoko ry’imodoka zikoresha amashanyarazi.

Ikindi uyu Mugabo yashyizemo imbaraga harimo kwagura amasoko cyane, ku buryo Volkswagen itangira kugera no mu bindi bice by’Isi nko mu Burasirazuba bwa Aziya, muri Afurika n’ahandi.

Icyakora nubwo yabashije kugarura izina ryiza rya Volkswagen, yanenzwe ibindi birimo uburyo bw’imiyoborere butanyuraga benshi mu bakozi b’iki kigo, kiri mu bya mbere bikoresha benshi kuko barenga ibihumbi 660 ku rwego rw’Isi.

Volkswagen ni ikigo kiyobowe mu buryo butoroshye kuko kuva kuri Leta iyoboye agace uru ruganda ruherereyemo, kugera ku miryango ya Porsche na Piech ifitemo imigabane, ndetse na sendika y’abakozi b’iki kigo, bose bagira uruhare mu ifatwa ry’ibyemezo bitandukanye.

Mu minsi ishize, Diess yiteranyije n’iyi sendika ubwo yavugaga ko abakozi barenga ibihumbi 30 bashobora kuzabura akazi kubera amakosa yakozwe mu mugambi wo kongera imodoka zikoresha amashanyarazi.

Ibi byarakaje aba bakozi ku buryo batangiye kumwikoma cyane, ariko aza kurokoka nyuma yo guhabwa icyizere n’Inama y’Ubutegetsi ya Volkswagen. Iki cyizere ariko cyari gisobanuye ko uyu mugabo atakaza zimwe mu nshingano yari asanzwe afite.

Ku rundi ruhande, amakuru avuga ko yatangiye kugirana amakimbirane n’imiryango ya Porsche na Piech, ku buryo byaje kurangira bemeje ko uyu mugabo w’imyaka 63 agomba kwegura mu mpera za Kanama, agasimburwa na Olive Blume w’imyaka 53, uzatangira inshingano ze ku itariki ya 1 Nzeri uyu mwaka.

Herbert Diess wari Umuyobozi Mukuru wa Volkswagen yeguye kuri uwo mwanya mu buryo bwatunguranye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .