Uko Umuryango Dorcas Consolation Family wateje imbere abahinzi bo mu Bugesera

Yanditswe na Dufitumukiza Salathiel
Kuya 28 Kanama 2020 saa 04:32
Yasuwe :
0 0

Abahinzi basaga 123 bibumbiye mu itsinda Duterimbere rikorera ubuhinzi ku nkengero z’ikiyaga cya Cyohoha, mu Karere ka Bugesera, barishimira umusaruro mwiza basigaye babona babikesha umuryango Dorcas Consolation Family (DCF).

DCF ni umuryango udaharanira inyungu, ushingiye ku bikorwa by’ubumuntu bifasha abatishoboye, abafite uburwayi n’abahuye n’ibindi bibazo by’ubuzima bibakomereye. Uyu muryango watangijwe na Kabanyana C. Keitsia mu Rwanda ahagana mu 2005.

Muri Gicurasi 2018, nibwo DCF yegereye abahinzi 123 bo mu Murenge wa Kamabuye na 139 bo mu Murenge wa Rweru yo mu Karere ka Bugesera; yiyemeza kubafasha gushyiraho uburyo bwo kuhira, guhuriza hamwe ubutaka no kubongerera ubushobozi nk’uko Umuyobozi wa DCF, Habimana Olivier abivuga.

Ati “DCF yegereye aba bahinzi kugira ngo tubafashe gukora ubuhinzi bujyanye n’igihe kandi bubyara inyungu.”

Habimana Olivier, yabwiye IGIHE uyu muryango wahawe inkunga ingana n’amadolari 25,000 n’umushinga GEF Small Grants Program ukorera mu ishami ry’Umuryango w’Abibumbye riharanira amajyambere UNDP ; n’Akarere ka Bugesera kagatangamo nkunganire ya miliyoni 15 Frw. Uwo mushinga w’imyaka ibiri wari ugenewe ayo matsinda yombi ya Rweru na Kamabuye.

Nk’uko umuhuzabikorwa w’umushinga GEF Small Grants Program, Laure Kananura abivuga, iyi nkunga yatanzwe mu rwego rwo gufasha abahinzi gukomeza ubuhinzi no mu gihe cy’impeshyi; aho baguriwe imirasire y’izuba itanga ingufu ku mashini yohereza amazi mu mipira bakoresha buhira.

Ati “Mu gihe cy’Impeshyi izuba riba ryatse, abahinzi batabona uko bakoresha ubutaka bwabo nyamara baturiye ikiyaga. Kubazanira ingufu z’imirasire zibafasha kugeza amazi mu mirima rero ni ukugira ngo no mu gihe nk’iki cy’izuba bakomeze ubuhinzi, beze, babone ikibatunga basagurire n’isoko. Umushinga wari ugamije nanone kwereka abahinzi ko atari ngombwa guhita batekereza ‘pompe’ zikoresha mazutu yangiza ikirere kandi inahenda.

Nyuma yo kubona ibikorwa by’ababahinzi bitanga umusaruro, Akarere ka Bugesera nako karabashyigikiye.

Umuyobozi w’ishami ry’ubuhinzi n’umutungo kamere mu karere ka Bugesera, Jean Damascene Sijyenibo, yavuze ko bahisemo kunganira DCF kuko babonaga hari impinduka.

Ati “Abaturage ba Rweru na Kamabuye twabonye ko aho DCF ibahuguriye ikanabafasha gukora ubuhinzi butanga umusaruro, twarabegeye tubafasha kwagura ubuso bahingaho imboga z’abo tubongerera n’imirasire itanga ingufu ku mashini ibafasha kuhira.”

Abahinzi barashima

Mbere yo gufashwa na DCF abagize itsinda Duterimbere bavuga bakoraga ubuhinzi bwa gakondo ndetse bukanabavuna kuko mukuhira bakoreshaga ‘arrosoir’ kandi aho buhira ari hanini.

Umwe mubagize iri tsinda Ahishakiye Venantie yagize ati “Mbere twakoreshaga “arrosoir” bitewe n’uko nkuze nuhiraga ahantu hato nkaba ndananiwe ngataha. byaratuvunaga cyane kandi umusaruro ukaba muke.”

Umuyobozi wa Duterimbere Musabyimana Peninah, na we avuga ko mbere kuhira byabagoraga cyane ariko ubu bakaba barahawe na DCF ikoranabuhanga riborohereza.

Ati “Baradufashije bazana imashini yifashisha imirasire bubaka n’urugomero, ubu biratworohera cyane."

Yanashimye cyane ubuyibozi be’Akarere ka Bugesera bwabongereye ingufu z’ imirasire. Ati "dutangira gukorana na DCF twahingaga kuri hegitari enye none ubu tugeze kuri hegitari 14”.

Aba bahinzi baremeza ko aho batangiriye kuhira byazamuye n’umubare w’amafaranga bakura muri ubu buhinzi bwabo.

Emmanuel Uwimpuhwe nawe uri mu bagize iri tsinda yagize ati “ Umurima mbere umuntu yahingaga akaba yasarura ibihumbi 100Frw ubu awukuramo ibihumbi 500Frw kandi atavunitse.”

Kananura asanga kuba Akarere ka Bugesera karashimye ibyo DCF yakoze ifatanyije na GEF SGP/UNDP ikiyemeza kwagura umushinga, ari ibintu byo kwishimira cyane. Asanga ubu bufatanye bwabahuza bikorwa ari ingenzi ku iterambere ry’abaturage.

Umuryango DCF usanzwe ukora n’ibindi bikorwa by’ubufasha nko kwishyurira mituweli abatishoboye aho umaze kwishyurira abarenga 10,000 kuva mu 2005, gufasha abana bacikije ishuri kurisubiramo, gutanga ibikoresho by’isuku ku bangavu n’ibindi.

Umuyobozi wa DCF, Habimana Olivier avuga ko bahisemo gufasha abaturage mu guteza imbere ubuhinzi bwabo
Umuyobozi wa Duterimbere,Musabyimana Peninah avuga ko DCF yabafashije kuvugurura ubuhinzi bwabo
Ibitunguru na byo biri mu mboga bahinga
Ubu abagize Duterimbere bahinga inyanya ku buso bunini
Kuhira hifashishijwe imipira birihuta kandi bigatanga umusaruro
DCF yafashije aba bahinzi kubona imirasire
kuhira ukoresha umupira ntibigoranye
Nyuma yo gufashwa kuvugurura ubuhinzi bwabo umusaruro wariyongereye cyane
Uru ni urugomero rwubatswe na DCF muri Kamabuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .