00:00:00 IGIHE NETWORK KN KINYARWANDA EN ENGLISH FR FRANCAIS

Uko Jenoside yakorewe Abatutsi yateguwe mbere n’uburyo yakozwe mu yahoze ari Gikongoro

Yanditswe na Prudence Kwizera
Kuya 2 July 2022 saa 02:41
Yasuwe :

Jenoside yakorewe Abatutsi mu Rwanda mu 1994 yarateguwe ikoranwa ubugome n’ubukana, mu minsi 100 gusa hicwa abarenga miliyoni imwe.

Inyandiko z’iyahoze ari Komisiyo y’Igihugu yo Kurwanya Jenoside, CNLG, zigaragaza ko mu yahoze ari Perefegitura ya Gikongoro hakozwe ubwicanyi bwibasiye Abatutsi bukozwe na Leta kuva mu 1959.

Zerekana ko kwica Abatutsi kuva mu 1959 bikomoka ku rwango n’ingengabitekerezo ya Jenoside byabibwe mu Banyarwanda.

Bamwe mu banyepolitiki bashinjwa kubiba urwango barimo Kayibanda Gregoire wabaye Perezida wa Repubulika ya mbere, Joseph Gitera wahimbye amategeko 10 y’Abahutu ari na ho amashyaka ya politike yavomye urwango.

Bamwe mu barokotse Jenoside yakorewe Abatutsi mu buhamya bwabo bagaragaza ko batangiye gutotezwa, kwicwa no gutwikirwa inzu mu 1959.

Kayitaba Michel avuga ko muri Gikongoro ubwicanyi bwatangiye mu 1959, Abatutsi barahigwa, baratotezwa ndetse baricwa.

Ati “Gutoteza Abatutsi no kubica byarakomeje no mu 1960 kuko iwacu naho bahagabye igitero baradutwikira ariko ku bw’amahirwe ntitwashya. Na nyuma yaho kudutoteza byarakomeje mu myaka ya 1963, 1973 no mu 1990 ndetse no mu 1994 aho ubwicanyi bwakozwe mu gihugu hose.”

Maitre Sinzi Tharcisse ukomoka mu yahoze ari Komini Rusatira muri Perefegitura ya Butare, aherutse gutanga ubuhamya agaragaza ko kuva hambere ibitero byagabwaga ku Batutsi byaturukaga muri Perefegitura ya Gikongoro mu myaka ya 1959, 1960, 1963 na nyuma yaho. Yavuze ko no muri Mata 1994 ibitero bya mbere bagabweho iwabo muri Komini Rusatira, byaturutse muri Perefegitura ya Gikongoro bahanaga imbibi.

Ati “Muri Butare ntabwo Jenoside yahise itangira ahubwo abicanyi baduteraga baturutse hakurya ku Gikongoro kuko na mbere hose niho baturukaga.”

Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène mu kiganiro yatanze mu 2019 akiri Umunyamabanga Nshingwabikorwa wa Komisiyo y’Igihugu yo Kurwanya Jenoside, CNLG, yagarutse ku bwicanyi bwibasiye Abatutsi mu 1963 muri Gikongoro nyuma y’inama yahuje Perefe Nkeramugaba n’abandi bategetsi iyobowe n’uwari Minisitiri w’Ubutegetsi bw’Igihugu, Rwasibo Jean Baptiste.

Yavuze ko muri raporo zakozwe n’Ababiligi n’Abapadiri icyo gihe bari kuri Paruwasi Cyanika na Kaduha bagaragaza ko kuri 26 na 27 Ukuboza 1963 ari ho ubwicanyi bwabaye bwinshi kandi bubi kuko zigaragaza ko Abatutsi batawe mu migezi babahambiriye amaboko inyuma, kugira ngo badashobora koga bakabata mu migezi ya Mwogo na Rukarara ari bazima.

Yavuze ko abandi barimo abana n’abakuru bagiye babashyira mu nzu zabo kuko inyinshi zari ibyatsi bakabatwikiramo.

Dr Bizimana yavuze ko muri Mutarama 1964 nyuma y’ibyumweru bitatu ubwo bwicanyi bubaye muri Gikongoro, Musenyeri Perraudin wabaye Arkiyepiskopi wa Diyoseze ya Kabgayi yandikiye Papa Yohani wa 23 na Radiyo Vatican abihakana.

Yagize ati “Yanditse ababwira ko ibyavuzwe mu mahanga ko hari Jenoside yabaye mu Rwanda ko ari ibinyoma; ko yego hari abantu bakeya bishwe ariko byaturutse ku gitero bo ubwabo bateye kandi Perezida Kayibanda nta ruhare abifitemo adashobora kwica kuko ngo ari umuperezida w’umukirisitu.”

Yavuze ko tariki ya 29 Mutarama 1964 Perezida Kayibanda yanditse ibaruwa ivuga ko Abatutsi bishwe kuko ari ibyitso by’Inyenzi kuko zari zaracengeye zikagera mu Cyanika na Kaduha hari gutegurwa gahunda yo kwica Abahutu bityo Abahutu baritabara.

I Murambi mu Karere ka Nyamagabe ahahoze ari muri Perefegitura ya Gikongoro hari Urwibutso rwa Jenoside yakorewe Abatutsi ruruhukiyemo imibiri irenga ibihumbi 50

Dr Bizimana yavuze ko ibyo byose byerekana ko ipfobya n’ihakana rya Jenoside yakorewe Abatutsi rigaragara muri iki gihe ryatangiye kuva kera.

Yagarutse kuri bamwe mu Bapadiri bishyize hamwe batangaza iby’ubwo bwicanyi baranabwamagana.

Ati “Abapadiri babayemo abantu b’intwari, ni bo babaye aba mbere mu kugaragaza imiterere y’ubwo bwicanyi bwaberaga mu Cyanika. Hari Abapadiri b’abamisiyoneri bishyize hamwe bandika ibarurwa ku itariki ya 12 Mutarama 1964.”

Bimwe mu bikubiye muri iyo baruwa

Iyo baruwa yagaragazaga ko ubuyobozi bwa Kiliziya Gatolika mu Rwanda budashobora kwamagana ubwo bwicanyi kubera impamvu zitandukanye zirimo ko Archeveque wari uhari ari umunyamahanga w’umu-Suwisi adashobora kwitandukanya n’ibikorwa bya Leta kuko ayishyigikiye.

Bimwe mu bikubiye muri iyo baruwa Dr Bizimana abisoma yagize ati “Ubungubu twandika uru rwandiko impunzi zari mu Cyanika Leta yarazirukanye izisubiza iwabo kandi inzu zabo zaratwitswe. Ubu kuri Paruwasi ya Cyanika harabarizwa abana b’imfubyi 138 bafite munsi y’imyaka irindwi. Abategetsi bakaba barategetse ko bagomba gushyirwa mu miryango y’Abahutu ikaba ari yo ibarera.”

Abo Bapadiri bibazaga uko abo bana bazabaho barererwa mu miryango y’abishe ababyeyi babo.

Bagaragaje ko umubare w’imirambo y’Abatutsi batawe mu migezi ya Mwogo na Rukarara wari hagati y’ibihumbi bibiri na bitatu.

“Twebwe nk’Abamisiyoneri turasanga tutagomba guceceka ibi bintu byo kubona ko abicanyi benshi ari abakirisitu ndetse bamwe muri bo bakaba ari abayobora abandi bakirisitu bakaba ari abarimu n’abagize imiryango ya kiriziya Gatolika.”

Bakomeje bagaragaza ko bibabaje kuba hari abantu babona ko ari ibintu bisanzwe bakabyita intambara nyamara atari byo ahubwo ari urwango rukabije ku bwoko bw’Abatutsi.

Abo Bapadiri bifuzaga ko ibikubiye mu ibaruwa yabo byatangazwa mu itangazamakuru rya Kiliziya Gatolika, amahanga yose akabimenya kandi n’umuntu wese uyibonye ntabiceceke.

Jenoside yakorewe Abatutsi ntabwo yatunguranye

Senateri Dr Emmanuel Havugimana, agikora muri CNLG, muri Mata 2019 yagaragaje ibimenyetso byerekana ko Jenoside yakorewe Abatutsi muri Mata 1994 itatunguranye kuko yateguwe kuva mu 1959.

Yagarutse no ku itegeko ryashyizweho mu 1963 rihana Abatutsi gusa nyamara barakoze ibyaha bimwe n’Abahutu.

Ati “Ni itegeko ryavugaga ko umuhutu wishe Umututsi cyangwa wononnye ibintu by’Umututsi hagati ya tariki 1 Ugushingo 1959 n’itariki 30 Kamena 1962 atazabihanirwa kubera ko yakoraga ‘revolution’ (impinduramatwara); ariko Umututsi watewe akirwanaho akagira Umuhutu yica we agomba kubihanirwa kubera ko yarwanyaga ‘revolution.’”

Yavuze ko iryo tegeko ryasohotse mu Igazeti ya Leta rimaze kwemezwa n’Inteko Ishinga Amategeko ryahaye imbaraga umuntu wese zo guhohotera Umututsi. Iryo tegeko ngo ryatumye Abatutsi bicwa kuri Noheli mu 1963 ubwo Inyenzi zari zateye mu Bugesera.

Yavuze ko icyo gihe muri Perefegitura ya Gikongoro hishwe Abatutsi barenga ibihumbi 20 barohwa mu migezi ya Rukarara na Mwogo. Mu Rwanda hose hishwe Abatutsi barenga ibihumbi 30.

Urwibutso rwa Jenoside rwa Murambi rusobanura amateka

I Murambi mu Karere ka Nyamagabe ahahoze ari muri Perefegitura ya Gikongoro hari Urwibutso rwa Jenoside yakorewe Abatutsi ruruhukiyemo imibiri irenga ibihumbi 50.

Urwo rwibutso rugizwe n’ibice bine bigaragaza amateka y’uko Jenoside yakorewe Abatutsi mu yari Gikongoro yateguwe ikanashyirwa mu bikorwa.

Igice cya mbere kigizwe n’amateka yerekana uko u Rwanda rwayobowe kuva ku Ngoma ya Cyami kugeza kuri Jenoside yakorewe Abatutsi n’uburyo ingabo zari iza FPR Inkotanyi zayihagaritse.

Igice cya kabiri ni imva rusange ishyinguyemo imibiri y’abishwe muri Jenoside, naho igice cya gatatu kigizwe n’ibyumba birimo imibiri yatoraguwe itarangirika, mu gihe igice cya kane kigaraza ibyobo byari byarajugunywemo abahiciwe ndetse n’ibibuga abasirikari b’Abafaransa bari barubatse iruhande rw’ibyo byobo.

Mu Murenge wa Cyanika naho hari urwibutso rwa Jenoside rushyinguyemo imibiri y’abishwe muri Jenoside yakorewe Abatutsi isaga ibihumbi 35.

Urwibutso rwa Jenoside rwa Cyanika ruruhukiyemo imibiri y’abazize Jenoside yakorewe Abatutsi irenga ibihumbi 35

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .