Uko igitaramo cy’impunzi cyatumye u Rwanda n’u Burundi birebana ay’ingwe mu 1979

Yanditswe na IGIHE
Kuya 22 Nzeri 2020 saa 07:35
Yasuwe :
0 0

Abanyarwanda bashobora kwibagirwa ibindi, ariko umuco wabo ni imwe mu nkingi bakomeraho aho bari hose. Uwo muco wakomeje kuranga ibihumbi by’impunzi zameneshejwe guhera mu 1959, ziwukwirakwiza hirya no hino ku buryo byaje kurakaza Leta ya Juvenal Habyarimana, umwuka mubi ugatutumba hagati y’u Rwanda n’u Burundi.

Nyuma yo kubona ubwigenge, u Rwanda rwakunze kurebana ay’ingwe n’u Burundi, ahanini kubera impamvu za politiki zari zishingiye ku kuba mu Burundi harayoboraga Abatutsi, mu Rwanda hakayobora Abahutu.

Buri ruhande rwahoraga rwikanga ko urwo bahanganye rwakoresha abanzi barwo mu guhirika ubutegetsi. By’umwihariko mu Rwanda, ubutegetsi bwahoranaga ubwoba ko Abatutsi bameneshejwe nyuma yo gutotezwa, bashobora gushyigikirwa n’ubutegetsi bw’i Burundi bakabona imbaraga ziza gukuraho ubutegetsi i Kigali.

Byarushijeho gukara mu 1972 ubwo mu Burundi habaga imvururu Abahutu bakibasirwa, bamwe bagahungira mu Rwanda. Ubuyobozi bw’u Rwanda n’u Burundi bwahoraga kuri radiyo za Leta butukana.

Habyarimana Juvenal amaze gufata ubutegetsi, umwuka wabaye nk’uba mwiza gato ndetse atangira kugenderana na Jean Baptitse Bagaza wari ku butegetsi i Burundi.

Ntibyateye kabiri ariko, umwuka wongeye kuba mubi guhera mu 1978, birushaho kuba bibi mu 1979. U Rwanda rwashinjaga u Burundi gushyigikira ibikorwa by’impunzi zishobora guhungabanya umutekano warwo, mu gihe n’u Burundi bwashinjaga u Rwanda n’inzego zarwo z’iperereza gukwirakwiza inyandiko muri Kigali, zisebya Guverinoma y’u Burundi.

Tariki 20 Kamena 1979, Habyarimana yasuye u Burundi ahura na Bagaza, bemeranya ko impande zombi zifatanya kurwanya ibihuha.

Nyamara Habyarimana yageze i Burundi hashize umunsi umwe Ambasaderi w’u Rwanda mu Burundi, Slyvestre Kamali, yandikiye ambasade y’u Bufaransa i Bujumbura, asaba ko impunzi z’Abanyarwanda zari muri icyo gihugu zitemererwa kuzagaragaza imbyino gakondo mu gitaramo inzu ndangamurage yabwo yari irimo gutegura.

Ambasaderi Kamali yavuze ko batewe impungenge n’uburyo izo mpunzi zatewe inkunga mu ibanga na Minisiteri y’Umuco mu Burundi, asaba ko icyo gikorwa gihagarikwa, ibitaramo nk’ibyo bikajya byitabirwa n’abagize ikigo ndangamuco cy’u Rwanda cyagombaga gufungurwa i Bujumbura muri iyo minsi.

Muri iyo baruwa, ambasade y’u Rwanda yageneye kopi Minisiteri y’ububanyi n’amahanga y’u Burundi, iy’umuco, Urwego rw’Iperereza, Ikigo ndangamuco cy’Abanyamerika n’ibindi bigo.

U Rwanda rwari rufite ubwoba ko u Burundi bwaba buri kwiyegereza cyane impunzi z’Abatutsi, kugira ngo babatere inkunga babone uko batera u Rwanda.

Iyo baruwa yakije umuriro mu bubanyi n’amahanga bw’u Rwanda n’u Burundi, nk’uko bigaragara mu nyandiko za ambasade ya Leta Zunze Ubumwe za Amerika mu Burundi, zashyizwe hanze n’urubuga WikiLeaks.

Tariki 27 Kamena, Minisiteri y’Ububanyi n’amahanga mu Burundi yasubije ibaruwa ya Amb. Kamali, inagenera kopi ambasade ya Amerika, iy’u Bufaransa na HCR.

Minisiteri yamenyesheje ambasade y’u Rwanda ko nta bubasha ifite bwo gutegeka ibikorwa n’ibidakorwa ku butaka bw’u Burundi, ndetse ko atari na yo ifite ububasha bwo kwandika mu izina ry’igihugu, ko byakabaye bikorwa na Minisiteri y’Ububanyi n’amahanga y’u Rwanda.

Minisiteri yatangaje ko impunzi ziri mu Burundi zigendera ku mategeko y’u Burundi, bityo ko mu gihe ibyakozwe bitanyuranye na yo, ambasade y’u Rwanda nta bubasha ifite bwo kubyamagana mu buryo nk’ubwo.

Tariki 28 Kamena, imiryango y’impunzi z’abanyarwanda mu Burundi nayo yanditse ibaruwa yamagana ukwivanga kwa ambasade y’u Rwanda mu bikorwa ndangamuco zikora.

Bagaragaje ko ibyo bakora ntaho bihuriye na politiki, ndetse ko nta bubasha Leta y’u Rwanda ifite bwo kubabuza kwishimira no kwamamaza umuco nyarwanda. Bahamagariye Umuryango Mpuzamahanga wita ku Mpunzi (HCR) gukomeza kubafasha no kubarinda, ngo badahungabanywa n’ibikorwa bya Guverinoma y’u Rwanda.

Kubera ko u Rwanda rwavugaga ko u Burundi bwihisha inyuma y’ubufasha buhabwa impunzi z’abanyarwanda, byongeye icyo gihugu kikaba cyari gifitanye umubano wihariye na Perezida Habyarimana, byabaye ngombwa ko igitaramo cy’impunzi z’Abanyarwanda gihagarikwa ku nyungu z’umubano w’ibihugu byombi.

Umuco nyarwanda ni kimwe mu byifashishijwe cyane n’impunzi z’abanyarwanda mu myaka ya 1970 na 1980, zimenyekanisha ikibazo cy’impunzi mu Rwanda binyuze mu buhanzi nyuma yo kubona ko ntawe uvuga ku kibazo cy’impunzi z’Abanyarwanda harimo n’Umuryango w’Abibumye.

Albert Rudatsimburwa ni umwe mu mpunzi z’Abanyarwanda bahungiye mu Burundi mu myaka ya 1959 na 1960. We n’umuryango we baje kuva i Burundi, bagana mu Bubiligi.

Rudatsimburwa avuga ko bifuzaga kwereka amahanga harimo n’umuryango w’abibumbye ko hari abanyarwanda b’impunzi hirya no hino ku Isi bifuza gutaha mu rwababyaye, babinyujije mu bihangano by’umuco.

Ati "Twibazaga ukuntu tumaze imyaka irenga 30 nta muntu uzi uko tubaho nk‘impunzi. Yaba Umuryango w’abibumbye ntawagiraga icyo atuvuganiraho mu ruhando rw’amahanga, niko gukoresha ibihangano byacu, turahaguruka turi benshi dukora ibitaramo na ba Cécile Kayirebwa n’abandi, icyo gihe rwose urubyiruko ruvuka ku banyarwanda rwabonaga ko iherezo ari ukuzashaka uko bagera iwabo."

Rudatsimburwa avuga ko ibyo bikorwa byababazaga Habyarimana na Leta ye. Yatanze urugero rw’aho itorero ry’abakobwa b’Abanyarwanda ryitwaga ’Imitari’ ryigeze kujya muri Gabon gukorayo igitaramo, rikakirwa neza rikanashimwa, Perezida Habyarimana abimenye ararakara.

Ati “Perezida Habyarimana abimenye ararakara, ukuntu iyo Festival yatumiye Impunzi z‘Abatutsi, ntitumire abahanzi bari mu gihugu, bimutera ikibazo kuko yabonye ko hari ibintu bigenda byigaragaza buhoro buhoro.”

Nubwo bacibwaga intege, impunzi z’abanyarwanda zari mu buhungiro ntizatezutse ku muco ndetse zakomeje kuwifashisha nk’inzira izabafasha gusubira mu rwababyaye. Binyuze mu bitaramo bakoraga, bashatse inkunga boherereje Inkotanyi mu rugamba zarimo rwo kubohora igihugu no guhagarika Jenoside yakorerwaga Abatutsi.

Gutegura igitaramo kw'impunzi z'abanyarwanda babaga i Burundi mu 1979 kwateje umwuka mubi hagati y'u Burundi n'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .